Por Europa Press / Redacción | SANTIAGO DE COMPOSTELA | 19/11/2020 | Actualizada ás 17:59
O paso á teledocencia co peche das aulas decretado a mediados do pasado mes de marzo polo avance da covid supuxo un "bofetón de realidade" pois, a diferenza do que se cría, nin as competencias tecnolóxicas de alumnos, profesores e pais eran as que se pensaban nin as familias dispuñan dos medios para seguir coa actividade escolar a distancia.
Díxoo o presidente da Confederación ANPAS galegas, Fernando Lacaci, durante a súa intervención na comisión de reactivación do Parlamento de Galicia, onde demandou que se aproveite "a foto fixa" do sistema educativo que brinda a crise do covid para acometer cambios que, ao seu xuízo, urxen para así deixar atrás un modelo "decimonónico" carente de participación.
"O sistema educativo galego está absoluta e rotundamente pechado. É imposible entrar. Parece que toda reunión é un ataque ou unha crítica, e non o é", sinalou Lacaci, que demandou apertura á Administración autonómica á hora de contar coa visión de nais, pais e demais axentes do universo educativo.
"Se non nos eschamos cada un manteremos o sistema educativo decimonónico que temos agora, no que a administración dita sen ter en conta a realidade que está a ordenar", sentenciou o presidente de ANPAS Galegas, que cre "imprescindible" contar cunha lei de educación a nivel autonómico que sirva para adaptar o sistema educativo ás necesidades actuais.
Unhas necesidades que, a xuízo da entidade que encabeza, pasan, entre outras cuestións, por desenvolver as competencias informáticas tanto de profesores como de alumnos e os seus pais, pois o paso á toledocencia durante o confinamento significou un "bofetón de realidade" polo "analfabetismo tecnolóxico" dos distintos actores da comunidade educativa.
E é que, segundo denunciou, os docentes demostraron non ter "competencias" para desenvolver as súas funcións na modernidade, algo que considera que "non é 100 por 100 imputable" aos propios profesores, senón que "maiormente é culpa do sistema".
Por iso, demandou un programa de formación ao profesorado en competencias de formación a distancia, así como un reforzo na atención específica a alumnos con necesidades especiais, que presenta unha realidade "mala en primaria e malísima en secundaria" por, di, falta de recursos económicas para que poida prestarse en condicións aceptables.
"Non existe capacidade tecnolóxica para asumir a teledocencia", sentenciou durante a súa intervención Lacaci, que lembrou que moitas das familias carecían de equipos ou de conexións a Internet que permitisen continuar coas actividades lectivas cos centros pechados.
Tras censurar que se conciba unha educación "limitada ao acadecimiso", o presidente de Anpas Galegas puxo o foco na "desconexión" entre os centros educativos e as familias, nas que, segundo denunciou, houbo problemas á hora de resolver as dúbidas que se presentaban no día a día.
E é que unha enquisa realizada por Anpas Galegas apunta a que máis do 50% dos contidos en primaria e o 66% en secundaria non estaban adaptados á teledocencia.
O GALEGO, "GRAN PREXUDICADO"
Por último, Lacaci subliñou que a lingua galega foi a "gran prexudicada" do confinamento na educación debido á ausencia de contidos docentes no idioma propio de Galicia.
Isto fixo que o castelán "se impuxese por goleada" ao recorrer a el como "un mal menor" ao non existir contidos en liña en galego para aquelas materias que se imparten nesta lingua.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.