A nova lei de saúde pública lexislará a intervención temporal de residencias de maiores en caso de pandemia

A proposta lexislativa que impulsou o Grupo Popular, en coordinación coa Xunta, para reformar a lei de saúde galega aproveita tamén para incorporar no seu articulado a intervención pública dos centros de servizos sociais, singularmente, as residencias de maiores. No texto lexislativo incorpora un novo artigo 38 sobre a intervención de servizos sociais, para os casos de "risco inminente e grave para a saúde da poboación", como crises sanitarias ou epidemias.

Nese caso, sinala o texto proposto, a autoridade sanitaria autonómica competente, e "sempre atendendo aos principios de necesidade e proporcionalidade" e á "situación de vulnerabilidade das persoas maiores, con discapacidade ou doutras persoas usuarias", poderá intervir os centros de servizos sociais de carácter residencial, públicos ou privados, e dispor distintas actuacións.

Concretamente, o texto habilita á Xunta a que "asuma ou controle" a asistencia sanitaria das persoas residentes co persoal sanitario propio do centro; ordenar, por motivos de saúde pública xustificados, o alta, a baixa, recolocación e traslado das persoas residentes a outros centros residenciais, "con independencia do seu carácter público ou privado". A adopción destas medidas requirirá a colaboración "voluntaria" das persoas afectadas ou, se non a hai, "a necesaria garantía xudicial".

Ademais, a través deste texto, cuxas medidas foron explicadas polo portavoz parlamentario popular, Pedro Puy, e o conselleiro de Sanidade, Julio García Comesaña, permitirá á autoridade sanitaria "establecer as medidas oportunas para a posta en marcha de centros residenciais" ou modificar a capacidade ou organización dos existentes.

A proposta lexislativa quere habilitar á Xunta a "supervisar e asesorar" nas actuacións que leve a cabo o persoal sanitario e non sanitario, de ser o caso, do centro".

Ademais, "tamén se designará un empregado público para dirixir e coordinar a actividade asistencial destes centros", que "substituirá plena ou parcialmente" ao persoal directivo do centro, e que "porá dispor dos recursos materiais e humanos do centro residencial intervido", así como "dos recursos vinculados á actividade sanitaria asistencial que se lles preste de forma habitual ás persoas residentes nel".

No texto tamén se recolle que poderá acordarse "un apoio puntual aos centros con persoal, de ser necesario".

Finalmente, permite á autoridade competente o uso dos centros residenciais para a súa utilización como espazos para uso sanitario.

INTERVENCIÓN TEMPORAL

A intervención, sinala o texto lexislativo, terá "carácter temporal" e a súa duración "non poderá exceder a necesaria para atender a situación que a orixinou".

Deste xeito, a autoridade sanitaria competente acordará, ou ben de "oficio" ou por "petición de titular do centro" o cesamento desta intervención, para o que ten que resultar "acreditada a desaparición das causas que o motivaron".

A intervención dun centro social poderase realizar coa "urxencia que o requira o caso", sen necesidade de seguir un procedemento administrativo específico e con independencia das medidas provisionais que se poidan adoptar.

Deberá estar motivada, de forma científica e cos datos e información dispoñibles, e ter en conta o principio de precaución. Ademais, sobre as medidas que se adopten, a futura lei sinala que deberán respectarse a dignidade das persoas, de forma que as medidas que se adopten deberán ser "o menos intrusivas e invasivas" posible, para lograr "reducir ao mínimo as molestias ou inquietudes asociadas". A futura lei di que "non se poderán ordenar medidas obrigatorias que comporten risco para a vida" e deberanse " utilizar as medidas que menos prexudiquen a libre circulación das persoas e dos bens, a liberdade de empresa e calquera outro dereito afectado".+

UNHA DUCIA DE RESIDENCIAS INTERVIDAS

A Consellería de Política Social, que dirixe Fabiola García, interveu unha ducia de residencias no que vai de crise sanitaria. Actualmente seguen nesta situación a Residencia de Salvaterra de Miño, a Residencia dos Gozos (Pereiro de Aguiar) e a Residencia Domusvi Ribadumia, ás que se sumou este xoves a Residencia Asilo de Vilalba.

Ademais, o departamento autonómico interveu, as seguintes residencias nesta crise: Domusvi Cangas, Domusvi Barreiro (Vigo), Residencia O Portazgo (A Coruña), Residencia A nosa Señora de Fátima (Barco de Valdeorras), Residencia Santa Teresa Jornet (A Coruña), Residencia do Incio, Residencia Domusvi Lugo (Outeiro de Rei) e Fogar residencial O Pilar (Culleredo).