Por E.P. | MADRID | 22/11/2020 | Actualizada ás 20:04
O presidente do Goberno, Pedro Sánchez, defendeu este domingo que a nova lei de educación o que fai é cumprir o artigo 3 da Constitución e, alí onde hai linguas cooficiais, "garantir" que "os estudantes poidan aprender eses dous idiomas".
En rolda de prensa no Palacio da Moncloa, Sánchez asegurou que a nova lei, na que o castelán deixou de figurar como "lingua vehicular" do ensino, o que fai é "cumprir as recomendacións do Consello de Europa de 2006 e 2017" porque o Goberno "considera que a pluralidade lingüística non é un pasivo, senón un enorme activo para o conxunto da sociedade".
Así, sinalou que, segundo a Constitución, en España hai catro linguas cooficiais, e que "a obrigación do Estado e as institucións é garantir o ensino dese catro linguas cooficiais" alí onde se falan.
Sánchez defendeu o conxunto da nova lei argumentando que é máis que evidente que España necesita reforzar e modernizar o seu sistema educativo, e que a reforma foi avalada por unha maioría absoluta da cámara e por seis grupos parlamentarios diferentes, mentres que a anterior aprobouna o PP en solitario --coa maioría absoluta que tivo entre 2011 e 2015--.
Segundo Sánchez, o Goberno esforzouse en tratar de acordar coa maior parte de forzas políticas unha reforma para modernizar o sistema educativo desde o punto de vista da "equidade e a excelencia" e dentro do Plan de Recuperación que o Goberno quere poñer en marcha con motivo da pandemia.
Así, avanzou que, unha vez aprobada esta lei educativa, o seguinte paso será abordar a Formación Profesional, unindo os sistemas para "dar un salto e consolidar a Formación Profesional dual", que está "absolutamente infradesenvolvida". Segundo dixo, o obxectivo é dotar a Formación Profesional de calidade, excelencia e prestixio, porque nos próximos anos a maior parte de ofertas de emprego serán para cualificacións intermedias, precisamente a franxa onde España está peor polo baixo desenvolvemento da FP.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.