(Gráficos) O sector servizos encadea sete meses de retrocesos en Galicia

O sector servizos rexistrou en Galicia un descenso da súa facturación do 5,7% en setembro respecto ao mesmo mes de 2019, segundo informou este luns o Instituto Nacional de Estatística (INE).

Mentres, a taxa anual no emprego diminúe tamén respecto de setembro do ano pasado, do mesmo xeito que ocorre en todas as comunidades autónomas. No caso de Galicia o descenso é do 4,7%, fronte ao 5,3% a nivel nacional.

A nivel estatal, o sector servizos rexistrou tamén unha caída da súa facturación do 12,7% en setembro respecto ao mesmo mes de 2019, moderando en máis de dous puntos a caída que experimentou en agosto (-15,3%).

Rexión de Murcia (3,3%) é a única comunidade autónoma que incrementa a súa cifra de negocios. O resto presentan taxas negativas. As que máis diminúen son Illas Baleares (-44,3%), Canarias (-33,1%) e Comunidade de Madrid (-17,7%).

SETE MESES DE RETROCESOS

Co descenso de setembro, os servizos encadean sete meses consecutivos de retrocesos interanuais como consecuencia da pandemia e os seus efectos sobre a economía.

Os sectores máis afectados por esta crise continúan sendo os relacionados co turismo. Así, as maiores caídas interanuais da facturación prodúcense nas actividades de axencias de viaxes (-83%), transporte aéreo (-75,1%) e servizos de aloxamento (-73,1%).

O comercio recortou un 6,8% a súa facturación anual, mentres que os outros servizos rexistraron un esborralle das súas vendas do 22,8% respecto de setembro de 2019.