As primeiras doses da vacina contra a covid-19 serán para os usuarios e traballadores de residencias

O Consello de Ministros analizou este martes o Plan de Vacinación contra a COVID-19, que recolle que os residentes e o persoal sanitario de residencias e centros de grandes dependentes serán os primeiros en vacinarse unha vez cheguen as primeiras doses, a partir de xaneiro de 2021, segundo anunciou o ministro de Sanidade, Salvador Illa. Despois, seguiralles o resto de persoal sanitario e os grandes dependentes non institucionalizados.

En total, na primeira etapa da vacinación vacinarase a 2,5 millóns de persoas, informou Illa. O ministro non pormenorizou cales serán o resto de grupos despois desta poboación máis vulnerable, pero defendeu con rotundidade que haberá vacinas para o "cento por cento da poboación española".

Illa considera que no mes de xaneiro "poderíase empezar a vacinar coas primeiras doses" que cheguen. Segundo destacou, unha vez sexa aprobada unha vacina a nivel europeo chegará nun breve período de tempo a España, unha vez sexa ratificada pola Axencia Española de Medicamentos e Produtos Sanitarios (AEMPS): "A entrega vai ser inminente unha vez sexa autorizada. Non haberá dilación de tempo entre ambas as aprobacións".

O Ministerio estableceu tres etapas de priorización dos grupos a vacinar en función das doses dispoñibles: o primeiro será entre xaneiro e marzo, cando se prevé unha "subministración moi limitada; na segunda, entre marzo e xuño, irase realizando un "incremento progresivo" no número de persoas a vacinar; finalmente, na terceira etapa, a partir de xuño, o obxectivo é cubrir xa a "todos os grupos prioritarios".

Segundo o ministro, a priorización vaise realizar "en base a un marco ético": "Principio de igualdade e dignidade de dereitos, necesidade, equidade, protección á discapacidade e ao menor, beneficio social, reciprocidade e solidariedade".

Illa explicou que se estableceron 18 grupos poboacionais en función de catro tipos de risco: mortalidade, exposición á enfermidade, impacto socioeconómico e transmisión da enfermidade. En calquera caso, sinalou que a estratexia "se irá actualizando" a medida que vaia aumentando o coñecemento sobre os detalles das vacinas.

Sanidade prevé que España poderá contar con ata 140 millóns de doses de vacinas contra COVID-19 a través dos acordos asinados pola Comisión Europea (CE) coas distintas compañías farmacéuticas desenvolvedoras. Así, o departamento dirixido por Salvador Illa calcula que se poderían realizar 80 millóns de inmunizacións, é dicir, case o dobre da poboación española (47,32 millóns).

No Consello de Ministros deste martes autorizouse, ademais, a compra de 20.873.941 doses da vacina de Pfizer para inmunizar a un total de 10.436.970 de persoas en España, xa que esta vacina require de dúas doses. Desta forma, o Ministerio concreta os termos do acordo formal de compra subscrito o pasado 11 de novembro entre a Comisión Europea e esta empresa.

Os contratos asinados pola Comisión Europea van chegar ata 1.400 millóns de doses, uns 800 millóns de inmunizacións, xa que case todas as vacinas desenvolvidas ata o momento, como as de Moderna, Pfizer ou AstraZeneca, constan de dúas doses. Polo momento, a candidata de Janssen é a única que se administraría nunha soa dose. Europa xa asinou cinco contratos para acceder a vacinas en desenvolvemento, mentres outras dúas están en estados "avanzados" de negociación.

"Calculamos que recibiremos 140 millóns de doses, para inmunizar a 80 millóns de cidadáns. Obviamente, máis da poboación que temos no noso país", indicou Illa. O motivo é asegurarse un número suficiente de vacinas no caso de que algunha delas non termine sendo aprobada pola Axencia Europea do Medicamento (EMA, polas súas siglas en inglés), algo posible ata que non se conte con máis datos definitivos. Da mesma forma, no caso de que haxa exceso de vacinas, realizarase a súa distribución cara a outros territorios non comunitarios, segundo fontes ministeriais.

A estratexia persegue dous obxectivos principais: "Reducir o máximo posible que a poboación faleza ou ingrese nun hospital, e que esteamos listos para vacinar desde o mesmo momento en que empecemos a recibir dose de vacinas aprobadas". Ten catro liñas estratéxicas: establecer unha orde de prioridade para vacinar a poboación, establecer os elementos loxísticos, crear un rexistro de vacinación e a comunicación tanto aos profesionais sanitarios como á poboación xeral.

En concreto, prevé distintas ferramentas e estudos que permitirán realizar seguimento e avaliación da cobertura, a seguridade e a efectividade das vacinas. Así, o Sistema Español de Farmacovixilancia, coordinado polo AEMPS, desenvolveu un Plan específico da vixilancia de seguridade das vacinas COVID-19, que analizará de forma continua as notificacións de sospeita de reaccións adversas realizadas tanto polos profesionais sanitarios como polos propios cidadáns vacinados, compartindo información co resto de axencias europeas e coa Organización Mundial da Saúde (OMS).

ILLA DESCARTA QUE A VACINACIÓN VAIA SER OBRIGATORIA

O ministro descartou que nas etapas iniciais a vacinación sexa obrigatoria. "Imos a partir da voluntariedade para a vacinación", comentou. Fontes ministeriais, con todo, non descartan que teña que adoptarse esa medida no caso de que Sanidade o estime necesario dentro da evolución da pandemia, xa que aseguran que existen as ferramentas necesarias para a obrigatoriedade da vacinación.

Illa lembrou que a vacina será "gratuíta" e administrarase a través do Sistema Nacional de Saúde (SNS). Así, defendeu que "será igual de segura que as do calendario de vacinación" habitual. "No noso calendario común de vacinación ao longo da vida temos 14 vacinas. A vacina número 15, a antiCOVID, será igual de segura que as que xa se están administrando en calendario vacinal cuns índices de vacinación moi por encima da media europea e que roza o 95 por cento no caso da poboación infantil", subliñou.

A portavoz do Goberno e ministra de Facenda, María Jesús Montero, celebrou os últimos resultados dos ensaios clínicos sobre vacinas e a presentación deste plan de vacinación: "Parece que comeza a verse, con toda a prudencia, a luz ao final do túnel. Sen dúbida, unha magnífica noticia para resolver unha pandemia que dura xa demasiado"

O presidente do Goberno, Pedro Sánchez, anunciou este venres que, coa presentación desta estratexia, Sánchez asegurou que España será "o primeiro país da Unión Europea xunto a Alemaña" en ter un plan completo de vacinación. "Estivemos traballando desde setembro neste plan. Estamos preparados", resaltou.

Sánchez tamén avanzou que o plan contará con 13.000 puntos de vacinación para garantir un "acceso equitativo ás vacinas" a través da Atención Primaria.