Case 17.000 mulleres solicitaron información ou axuda nos CIM municipais de Galicia en 2019

Unhas 17.000 mulleres solicitaron en 2019 información ou axuda nalgún dos centros de información á muller (CIM) de titularidade municipal situados na Comunidade.

Así se desprende dun estudo difundido este martes pola Federación Galega de Municipios e Provincias (Fegamp), no que se precisa que se trata do primeiro informe de análise global sobre o sistema e asistencia á muller prestado polos municipios galegos. A iniciativa xurdiu a raíz das preocupacións trasladadas por parte da Asociación de Profesionais dos CIM (Asocim) ao presidente da Fegamp, Alberto Varela.

O informe, baseado nos datos de 74 dos 82 CIM galegos, desvela que en 2019 ao redor de 17.000 mulleres solicitaron algún tipo de información ou axuda nestes centros.

Tamén constata que a distribución dos CIM é claramente desigual entre as provincias costeiras e as de interior, de modo que a suma dos centros das provincias de Lugo e Ourense non alcanzan a cifra dunha soa das provincias do litoral, coas dificultades de acceso que supón unha gran dispersión.

Aínda que a maioría dos centros atende a mulleres de municipios da contorna que non contan con este servizo, detéctanse cinco comarcas na 'Sombra'.

CALIDADE ASISTENCIAL

Unha das preocupacións do persoal destes centros é a calidade asistencial nos CIM máis desbordados, xa que a lei non fixa cocientes de traballadores en función da demanda nin dos servizos prestados.

Así, tan só un 5 por cento dos CIM contan con persoal administrativo que alivie nas tarefas burocráticas a quen se encargan da asesoría xurídica ou psicolóxica ou que evite interrupcións durante a atención ás usuarias por "ter que abrir a porta ou coller o teléfono".

Aínda que si se garante o mínimo de 10 horas de atención semanal esixidas pola lei para obter a certificación, o persoal a tempo parcial non é unha excepción.

FINANCIAMENTO

Segundo o estudo, o financiamento tampouco responde as necesidades reais; os fondos europeos xestionados pola Xunta de Galicia teñen un máximo de 45.000 euros, independentemente dos requirimentos, de forma que o CIM que máis usuarias atende (Vigo, 1.060 mulleres) recibe a mesma cantidade que un centro con 250.

A forma de financiamento dos CIMs varía considerablemente en función do tamaño do municipio; mentres que nos centros máis pequenos o orzamento depende máis das subvencións, a medida que a demanda, as necesidades e os servizos prestados aumentan, os concellos ven obrigados a facer un importante esforzo orzamentario, "chegando a achegar ata o 88% do financiamento do centro".

DEMANDAS

A Fegamp incide en que sería desexable, na medida do posible, que todas as mulleres "teñan garantido o acceso a un CIM municipal e que este dereito non dependa das posibilidades dos concellos".

Para iso, en base á análise dos datos do estudo e ás inquietudes dos traballadores, apélase ao desenvolvemento dunha estratexia autonómica que estableza criterios de localización e prestación servizos tendo en conta factores como a xeografía, a densidade poboacional e as características sociodemográfricas.

Así mesmo, tamén se avoga por mellorar a lei e o sistema de financiamento establecendo cocientes que permitan aumentar a calidade asistencial.

Teléfono de asistencia 016 para atender situacións de violencia de xénero