Cribado masivo e gratuíto de cancro de próstata en Pontevedra durante a última semana de novembro
O hospital Vithas recalca a importancia das revisións en homes de máis de 50 anos, momento no que aumenta o risco de sufrir este cancro
Por E.P. | SANTIAGO DE COMPOSTELA | 26/11/2020 | Actualizada ás 13:43
O hospital Vithas Pontevedra realiza, ao longo da última semana de novembro, un cribado masivo e gratuíto de cancro de próstata, enmarcado na campaña de concienciación, especialmente enfocada a maiores de 50 anos, que está a levar a cabo o hospital.
Segundo indicou o hospital nun comunicado, a proba consiste nunha simple análise de sangue, onde se rexistra o índice de PSA (siglas que en inglés corresponden ao antíxeno específico prostático), un dos indicadores máis evidentes da presenza do cancro de próstata, e compleméntase cunha enquisa sobre os hábitos urinarios do paciente.
Aínda que a campaña diríxese a todo aquel que estea interesado, o urólogo Antón Zarraonandía incidiu na importancia de que todo home de máis de 50 anos se someta a controis periódicos da súa saúde prostática, xa que está demostrado que a incidencia deste tipo de tumores aumenta coa idade, especialmente a partir dos 70 anos.
Segundo datos da Sociedade Española de Oncoloxía Médica (SEOM), recollidos polo hospital, o cancro de próstata é o máis frecuente entre homes, con máis de 35.000 diagnosticados cada ano. Se se detecta nunha fase inicial, a solución cirúrxica resulta moi efectiva, con taxas de supervivencia de ata o 99% ao dez anos.
É por este motivo que o Dr. Zarraonandía subliñou o transcendente dos controis preventivos xa que, en ocasións, os síntomas deste tipo de cancro non son evidentes e pódense confundir con outras patoloxías.
