O alcalde confía en que as obras da estación do AVE de Santiago comecen a principios de 2021
Bugallo espera que rematen en 2023.
Por E.P. | Santiago de Compostela | 27/11/2020 | Actualizada ás 14:54
O alcalde de Santiago de Compostela, Xosé Sánchez Bugallo, anunciou este venres que o proxecto da estación do AVE está preparado para a fase de construción, á espera da firma da presidenta de ADIF, Isabel Pardo de Vera, así como da aprobación dos Orzamentos Xerais do Estado.
O alcalde declarou que espera que, unha vez aprobados os orzamentos --que destinarán 30 millóns de euros á estación do AVE--, as obras poidan iniciarse "a principios de 2021, e terminada a construción para 2023".
Xosé Sánchez Bugallo referiuse tamén ao complexo intermodal de Santiago de Compostela, do que formará parte a estación de alta velocidade. "A intermodal será a principal infraestrutura de comunicación terrestre de Galicia, sendo a que máis persoas mova", declarou o alcalde. Segundo os datos achegados polo goberno local, estímase que o complexo intermodal acolla 7,8 millóns de persoas ao ano.
O alcalde explicou que esta cantidade de usuarios levará "problemas de conectividade", especialmente co ensanche. O goberno local, tal e como anunciou Bugallo, destinará, dentro do seu superávit, 600.000 euros para solucionar estas cuestións. "Así se reforzará a centralidade do ensanche e a conectividade de toda a cidade", subliñou o rexedor.
