O ministro de Xustiza destaca a "reparación histórica" coa próxima entrega de Meirás ao Estado
O xulgado fixou inicialmente o 10 de decembro para a entrega do inmoble.
Por E.P. | SANTIAGO DE COMPOSTELA | 30/11/2020 | Actualizada ás 14:01
O ministro de Xustiza, Juan Carlos Campo, situou nun contexto de "reparación histórica" a entrega proximamente do pazo de Meirás ao Estado, en aplicación da execución provisional da sentenza ditada polo Xulgado de Primeira Instancia número un da Coruña.
Fíxoo durante a súa intervención nun almorzo informativo orgnaizado por Europa Press e ao referirse ás actuacións do Goberno, entre as que enmarcou "leis para restituír o que nos arrebataron outros nun contexto de reparación histórica e de memoria democrática". E neste contexto, dixo, o Estado recibirá "en moi poucos días as chaves de Meirás". "Como exemplo desta reparación histórica", engadiu na súa intervención.
Para esta entrega, o xulgado fixou inicialmente o 10 de decembro, aínda que antes, o día 2, haberá unha vista ante as peticións presentadas polas partes en relación coas medidas cautelares ditadas polo xulgado para realizar un inventario dos bens, tras o cal se procederá á entrega do inmoble.
Os Franco opóñense a el, á vez que pediron que, en todo caso, se pospoña a data do 10 de decembro para a execución provisional da sentenza, mentres que o Estado pediu o depósito xudicial dos bens ata que haxa unha sentenza firme.
