A creación de sociedades mercantís en Galicia sobe respecto a novembro de 2019 pero baixa en comparación con outubro

A creación de sociedades mercantís subiu un 2,65% en novembro en Galicia en relación co mesmo mes do ano anterior, ata 271, segundo os datos que publica este xoves o Instituto Galego de Estatística (IGE). Con todo, son 23 menos que en outubro. De acordo coa información do boletín oficial do rexistro mercantil, o capital medio subscrito polas sociedades constituídas ascendeu a 137.406,87 euros por sociedade.

Por outra banda, ampliaron o seu capital social 83 sociedades mercantís, por máis de 26 millóns de euros. Con respecto ao mesmo mes do ano pasado, foron seis sociedades máis.

Como en meses precedentes, en novembro as provincias de Pontevedra e A Coruña rexistraron o maior número de constitucións, co 42,07% das sociedades mercantís creadas no primeiro caso e o 40,22% no segundo. O 9,96% das novas empresas constituídas fixou a súa sede na provincia de Lugo e o outro 7,75% restante na provincia de Ourense.

Case todas as empresas constituídas en novembro en Galicia adoptaron a forma de sociedades de responsabilidade limitada. O capital medio subscrito por este tipo de sociedades foi de 142.052,35 euros por empresa.

O 28,41% das empresas creadas en novembro pertencen á rama do comercio. As seguintes actividades en importancia son as actividades inmobiliarias, financeiras e de seguros (co 12,92% das constitucións rexistradas en novembro) e a construción (12,92%).

A presenza do sexo masculino segue sendo maioritaria na creación de empresas, como en meses precedentes: 257 socios (o 77,2% do total) fronte a 76 socias (22,8%) en novembro de 2020.

Ademais, as sociedades mercantís creadas en Galicia adoitan estar compostas por un número de socios pequeno, limitado nunha porcentaxe moi elevada das constitucións a unha soa persoa. De feito, en novembro, o 77,12% das sociedades constituídas foron creadas por un único socio fundador e o 19,19% por dous.

En novembro de 2020 disolvéronse 127 sociedades mercantís en Galicia, 44 máis que en outubro de 2020. Con respecto ao acontecido hai un ano, o número de disolucións aumentou en sete unidades.

Vinte e sete empresas reduciron o seu capital social en novembro. Este mes rexistráronse dous procedementos de fusión de sociedades e un de escisión.

O mes de novembro pechou con 27 sociedades afectadas por concurso de acredores. Con respecto a hai un ano, en novembro de 2019 había dúas sociedades menos afectadas por esta situación que en novembro de 2020.