Médicos interinos e eventuais de Ferrol esixen unha oposición extraordinaria para acabar coa precariedade

Medio centenar de médicos eventuais e interinos da área Sanitaria de Ferrol concentráronse no mediodía deste xoves ante a entrada do Hospital Arquitecto Marcide para demandar unha oposición extraordinaria que lles permita regularizar a súa situación e acabar coa precarización na sanidade pública, tal e como asegurou o portavoz do colectivo, Juan Pablo Alarcón.

"Nós o que reclamamos é unha oposición extraordinaria, que está reflectida no Estatuto Marco, no artigo 21, que así o recolle para situacións excepcionais, como a que actualmente estamos a vivir", manifestou o facultativo, que lembrou que esta fórmula xa foi utilizada en 2012.

O profesional trasladou que "actualmente o 40% das prazas que existen no Sergas de toda Galicia están ocupadas por médicos eventuais e interinos" e que estes non teñen "a opción de optar por un posto fixo debido a que non se realizaron as oposicións que se deberían convocar".

Así mesmo, destacaron que a última convocatoria deste tipo foi no ano 2016, "mentres que os concursos de traslado se seguen celebrando ano a ano". "E é por iso polo que imos saltando de posto de traballo", asegurou para soster que iso trae carrexado un prexuízo aos pacientes, aos que non se lle pode realizar un seguimento correcto.

Con todo, o colectivo explicou que rexeita ir á folga ao considerar que iso incidiría aínda máis nos pacientes, especialmente nun contexto de pandemia no que están "saturados de traballo", con "moita tensión laboral".

En canto á Área Sanitaria de Ferrol, segundo Juan Pablo Alarcón, "o 35% do persoal estea nesta condición de contratos precarios, tanto eventuais como interinos".