A incidencia acumulada de máis de 350 casos nos últimos 14 días, clave para o peche de Boiro
Sanidade apoia a súa decisión nos informes negativos da Dirección Xeral de Saúde pública.
Por Europa Press / Redacción | Santiago de Compostela | 05/12/2020 | Actualizada ás 12:51
A incidencia acumulada a 14 días de 366 casos resultou clave para que o comité de expertos da Consellería de Sanidade acordase pechar perimetral desde este sábado o concello barbancés de Boiro, onde se elevan as restricións ao máximo nivel pola evolución negativa da pandemia.
Así figura na orde publicada na noite do venres no Diario Oficial de Galicia (DOG) e que establece o paso ás restricións severas no Concello de Boiro, así como a relaxación das medidas en Neda, Fene, Burela, Oleiros, Lalín e Oroso ante a tendencia positiva nos datos epidemiolóxicos.
Deste xeito, Sanidade apoia a súa decisión nos informes negativos da Dirección Xeral de Saúde pública sobre a evolución da pandemia en Boiro, onde a maior taxa de positividade está a darse na franxa de idade que vai dos 35 aos 39 anos.
Así as cousas, a localidade da ría de Arousa presenta unha incidencia acumulada durante 14 días de 366,6 casos, ademais de rexistrar máis de 10 positivos durante os tres últimos días.
Por todo iso, e tendo en conta que Boiro conta cunha poboación de máis de 10.000 habitantes --case 19.000, segundo os últimos datos do Instituto Galego de Estatística--, Sanidade acorda elevar as restricións nesta localidade, medida que é efectiva xa desde a madrugada do sábado.
