Por Europa Press / Redacción | Santiago de Compostela | 07/12/2020 | Actualizada ás 14:23
O portavoz parlamentario do PPdeG, Pedro Puy, replicou que as críticas da oposición ás medidas da Xunta para tratar de frear o avance do coronavirus non teñen "ningún apoio científico".
Puy defendeu que en Galicia as decisións se toman con base no que expón o comité clínico en función da situación epidemiolóxica.
"Estamos nunha pandemia, as cifras cambian todos os días, trátase de evitar que o número de contaxios creza e protexer a vida", destacou Puy, antes de indicar que a nova normalidade "consiste en ir vendo como evoluciona" a covid-19 e tratar de ir "minimizando" os seus efectos, pero sen facer "máis do estritamente necesario para non prexudicar a vida económica".
Neste contexto, afirmou, sobre as críticas de PSOE e BNG: "Non vin ningún apoio científico a estas críticas".
Así, preguntouse "en base a que criterios clínicos se recomenda un peche maior" en resposta ao Bloque e asegurou non entender "moi ben o que propón o PSOE", posto que a incidencia do coronavirus é "distinta" no tempo e no espazo e as medidas, resaltou, "non poden ser uniformes para todo o país".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.