O inventario de Meirás inclúe case 700 bens: desde mobles da familia real ata as estatutas do Mestre Mateo

O inventario do pazo de Meirás, realizado a petición do Estado e aceptado polo Xulgado de Primeira Instancia número 1 da Coruña --que condenou aos Franco á devolución do inmoble-- inclúe desde mobiliario da familia real, pasando polas estatuas de Isaac e Abraham, do Mestre Mateo, ata bustos de Emilia Pardo Bazán, segundo recolle a documentación.

En concreto, o inventario realizado polos técnicos da Consellería de Cultura, Educación e Universidade, con 1.021 imaxes e 80 arquivos de vídeo, inclúe un total de 697 bens, tanto os situados no exterior, con descrición de edificios e construcións, como os do interior. Neste caso, figura unha anotación específica sobre o inventario de alfombras e téxtiles e outra sobre a biblioteca, con fondos bibliográficos en tres lugares distintos.

O documento, de 163 páxinas, inclúe a descrición de 81 elementos no exterior do inmoble e 616 no interior. No caso dos primeiros, inclúense desde un escudo ducado de Franco e escudos de armas doutras familias ata tres hórreos, un cruceiro, esculturas de pedra representando a distintos santos como San Paulo ou San Andrés, composicións de labra heráldica ou pilas bautismales.

Hai tamén unha réplica do parteluz da Catedral de Santiago; un grupo escultórico de músicos populares sobre unha peaña de pedra, aínda que tamén outros elementos sen valor artístico ou histórico como unha pista de tenis.

No interior, a listaxe inclúe as estatutas de Isaac e Abraham do Mestre Mateo e numerosos cadros, entre eles un de Cristo crucificado, pero tamén de Franco e Carmen Polo ou de Emilia Pardo Bazán, da que tamén hai bustos.

Unha pila de auga bendita, lámpadas, camas, trofeos de caza, maquetas de barcos, un nacemento napolitano en urna, un busto metálico de Francico Franco, mesas de té, butacas de madeira tallada e retablos de madeira con imaxe da Virxe María co neno son algúns dos moitos e diferentes bens inventariados.

CARÁCTER INSTITUCIONAL

Á súa vez, no informe de Patrimonio Nacional, menos extenso, con 61 páxinas, detállanse bens mobles históricos de carácter institucional como unha pantalla de cheminea, un sofá de talla dourada, unha mesa vitrina, un sofá de caoba, un conxunto de escritorio e cómoda e libros como un almanaque destinado a explicar a estrutura e organización do Estado da que se conserva un exemplar da época de Alfonso XII.

No caso da mesa vitrina, como fai con outros elementos inventariados, precisa que ese moble formou parte da decoración da sala de música da raíña Vitoria Eugenia no Palacio Real de Madrid.

No informe, especifícase que se recolle a documentación obtida nunha investigación preliminar, "estudando bens mobles máis reconocibles como de Patrimonio Nacional dos conservados en Meirás".

COLECCIÓNS REAIS ESPAÑOLAS

"Con todo, é moi posible que non sexan os únicos e que, de continuar as investigacións, se atope máis documentación relacionada coa titularidade doutras das pezas conservadas no edificio". Así, apunta que hai máis pezas das apuntadas no informe "que fan sospeitar que poderían ter a súa orixe nas Coleccións Reais Españolas".

"O mesmo ocorre coa biblioteca", sinala no citado informe, no que engade que "nos bens mobles da primeira metade do século XX de cáracter institucional figuran alfombras, porcelanas e mobiliario".