A segunda onda comeza a descender, aínda que non o número de mortos
Baixa a presión hospitalaria en Galicia e descenden os novos casos detectados ata os 232.
Por Europa Press / Redacción | SANTIAGO DE COMPOSTELA | 08/12/2020 | Actualizada ás 11:22
O número de persoas hospitalizadas en Galicia con covid-19 descendeu lixeiramente nas últimas horas, ao pasar de 412 a 372; tempo no que tamén baixan o número de novos positivos detectados, que se sitúan en 232 (28 menos). Con todo, o número de mortos segue elevado. Este luns informouse de 16 novos falecidos, aínda que sete deles eran correspondentes a segunda quincena de novembro.
En concreto, segundo os datos que publica este martes a Consellería de Sanidade actualizados ás 18,00 horas do luns, un total de 322 persoas permanecen ingresadas nas plantas dos hospitais galegas; mentres que nas unidades de coidados intensivos hai 50 pacientes.
Así, a área con máis persoas ingresadas segue sendo a da Coruña e Cee, que ten 104 pacientes con covid --16 menos-- nos seus centros hospitalarios. Deles, baixaron en cinco o número de casos en coidados críticos, ata os 17. Tamén descenderon as persoas en planta ata as 87 --11 menos--.
Na área de Vigo, hai 68 persoas hospitalizadas, das que 9 están na UCI (dúas menos) e 59 en planta (sete menos); mentres que na área de Pontevedra e O Salnés hai 49 pacientes covid nos hospitais: 9 están en coidados intensivos (os mesmos que 24 horas antes) e 40 en unidades convencionais (catro menos).
Na área de Santiago e O Barbanza si se experimenta un lixeiro aumento. Así, hai 57 persoas hospitalizadas. Delas, seis permanecen na UCI (as mesmas) e 51 están ingresadas en planta --seis máis--. Na área de Ourense, Verín e Barco de Valdeorras hai 36 persoas con covid-19 nos diferentes hospitais, das que tres seguen na UCI --dúas menos-- e 33 están en unidades convencionais --seis menos--.
En Ferrol o número de ingresados baixou a 33. En concreto, os casos en UCI baixaron de 8 a 4, e os pacientes en planta sitúanse en 29. Finalmente, na área sanitaria de Lugo, Monforte e A Mariña, baixan de 20 a 23 os pacientes en unidades convencionais de hospitalización. Ademais, dúas persoas permanecen na UCI.
BAIXAN OS POSITIVOS DIARIOS
Máis aló dos ingresados, Galicia sumou en 24 horas outros 232 positivos por covid-19, unha baixada de 28 con respecto ao día anterior. As PCR realizadas sitúanse en 5.618 --254 máis que as realizadas hai un día--.
De novo, a área sanitaria de Vigo foi a que máis contaxios novos rexistrou, un total de 59, seis máis que os notificados unha xornada antes. Ademais, repuntan en Santiago, ata os 54 novos casos --11 máis--; e en Pontevedra que rexistra 41 --12 máis--.
Pola súa banda, a da Coruña-Cee detectou outros 26 positivos --26 menos--, na de Ferrol 16 --20 menos--; na Lugo-A Mariña-Monforte outros 16 --12 menos--; e en Ourense-Verín-O Barco de Valdeorras, 20 (un máis).
