Detectados 12 casos entre as 733 cribadas en Sarreaus
Arrinca o das Pontes, na Coruña, con 2.000 citados.
Por E.P. | SANTIAGO DE COMPOSTELA | 09/12/2020 | Actualizada ás 13:52
Un total de 12 casos positivos foron rexistrados no cribado posto en marcha polo Servizo Galego de Saúde (Sergas) no municipio ourensán de Sarreaus, mentres que outro arrinca este mércores nas Pontes (A Coruña) con 2.000 persoas citadas.
En concreto, segundo informou a área sanitaria de Ourense, 733 persoas das 930 citadas acudiron ao cribado posto en marcha no pavillón de deportes de Sarreaus. Destas, o 70% xa foron procesadas e permitiron detectar 12 novos positivos. Con estes datos, esta localidade ourensá conta con 32 casos activos.
Por outra banda, a área sanitaria de Ferrol deu conta do inicio do cribado voluntario para a detección precoz da covid na poboación do municipio das Pontes, no que están chamadas a participar unhas 2.000 persoas.
