Once concellos de Ferrolterra estarán no plan de transporte metropolitano cun investimento de 3,7 millóns de euros
O plan de transporte metropolitano de Ferrol permitiu que entre o 2017 e o 2019 aumentase un 10% o número de viaxes realizadas, superándose o ano pasado a cifra de 2,65 millóns de viaxes bonificadas.
Por E.P. | SANTIAGO DE COMPOSTELA | 09/12/2020 | Actualizada ás 18:06
O delegado da Xunta na provincia da Coruña, Gonzalo Trenor, asinou este mércores os contratos do plan de transporte metropolitano de Ferrolterra co once municipios da comarca que participan nesta iniciativa de mobilidade, que conta cun investimento de 3,7 millóns de euros para o próximos catro anos.
A rúbrica do convenio realizouse con todos eles no Edificio Administrativo da praza de España, salvo co concello de Ferrol, que se levou a cabo na propia casa consistorial da cidade naval con presenza do alcalde, Ángel Mato.
Trenor destacou que estes convenios suporán un investimento anual de case un millón de euros para financiar os descontos en billetes, transbordos e bonificacións adicionais a usuarios frecuentes e membros de familias numerosas.
Os once concellos integrantes desta área de transporte son Ares, Cabanas, Cedeira, Fene, Ferrol, Miño, Mugardos, Narón, Neda, Pontedeume e Valdoviño, que achegarán entre todos uns 353.000 euros, o que supón unha achega do 20% do montante total.
Así as cousas, o 80% restante corre por conta da Xunta, que financia a totalidade de transbordos, así como parte dos descontos adicionais aos usuarios habituais (15%) e familias numerosas (ata o 50%).
O plan de transporte metropolitano de Ferrol permitiu que entre o 2017 e o 2019 aumentase un 10% o número de viaxes realizadas, superándose o ano pasado a cifra de 2,65 millóns de viaxes bonificadas.
Este plan social supón que na actualidade máis de 71.400 veciños da área da Ferrol se beneficien xa dos descontos do Cartón de Transporte Metropolitano (TMG) nos seus desprazamentos habituais.
No caso da área de Ferrol, o plan de transporte metropolitano inclúe tamén os servizos ferroviarios de FEVE, polo que a Xunta tamén renovará do convenio con Renfe para manter a integración desta liña no sistema de transporte metropolitano entre os concellos integrados, cun orzamento duns 27.000 euros.
Ademais, na área de Transporte de Ferrol tamén hai máis de 9.600 mozos menores de 21 anos que viaxan gratuitamente en autobús co cartón 'Xente Nova'.
