O BNG pídelle a Feijóo unha fronte común para os fondos da UE e este esíxelle que rompa co PSOE
"Querían parecerse a Rufián e confórmanse con parecerse a Arrimadas", advirte o presidente aos nacionalistas galegos.
Por Europa Press / Redacción | Compostela | 10/12/2020 | Actualizada ás 13:49
A portavoz do BNG, Ana Pontón, instou a "sumar forzas" para lograr que Galicia se beneficie ao máximo dos fondos europeos de reconstrución activados pola pandemia, mentres que o presidente, Alberto Núñez Feijóo, contestoulle que "probablemente poderían facer cousas en común" se os nacionalistas --retou-- rompen os seus acordos co PSOE --co que gobernan en varios concellos e deputacións).
"É que me di de facer unha fronte común contra o PSOE, o seu socio. É sorprendente", dixo o presidente galego, quen, en todo caso, asegurou que escoitará as propostas do BNG e lembroulle que, con tal fin, traballa na Cámara a comisión para a reactivación económica e social. Ademais, lembrou que a Xunta reservou 100 millóns no bautizado como 'Fondo Consenso' para poder acometer as accións que se acorden no devandita relatorio.
Na sesión de control, previamente, Pontón puxo o foco nos fondos 'Next Generation' para remarcar que, aínda que podería usar a súa intervención para "criticar a falta de liderado e de estratexia" da Xunta, prefería facer un chamamento a tentar "sumar forzas" para deseñar "unha estratexia de país" que evite que Galicia sexa "discriminada" e "perda tamén o tren" dos fondos de reconstrución que chegarán de Europa.
"QUERÍAN PARECERSE A RUFIÁN"
Feijóo contestou que a Xunta "si" ten unha estratexia para a captación de fondos europeos e incidiu en que os alicerces que enumerou Pontón son precisamente nos que se asenta. "Benvida", trasladou o presidente.
Ao tempo, reivindicou que Galicia terá máis oportunidades por ser unha Comunidade "solvente" grazas, dixo, a que "non se fixo moito caso ao BNG e a outras forzas en política económica". De facelo, advertiu que Galicia tería "case 6.000 millóns máis de débeda".
Dito isto, cargou contra o Goberno central e lembrou ao BNG que o Executivo de Pedro Sánchez, que "debe" recursos do IVE a Galicia, foi investido "grazas ao voto" do BNG. "Asinan un acordo e agora vénnos a pedir unha fronte común? Estaría o PSOE nesa fronte común?", preguntou o presidente galego, quen ironizou con "a papeleta" dos nacionalistas galegos, que "querían parecerse a Rufián" e confórmanse " con parecerse a Arrimadas".
