Por E.P. | SANTIAGO DE COMPOSTELA | 10/12/2020 | Actualizada ás 18:30
O vicepresidente económico do Goberno galego, Francisco Conde, informou de que a Xunta leva recadados 229 millóns de euros co canon eólico e, en resposta a unha interpelación na que Noa Presas (BNG) denunciou o "pelotazo" no sector, defendeu que a Xunta "non autorizará ningún proxecto que non sexa compatible coa protección e sustentabilidade do medio ambiente".
Conde apunta que o Goberno galego cumpre "todas as garantías desde o punto de vista xurídico e normativo" no desenvolvemento do sector eólico, polo que convida ao Bloque a "acudir" a tribunais se cre que se incumpren.
Así mesmo, subliñou que en 2019 puxéronse en marcha 18 parques eólicos en Galicia, entre os cales houbo acordo "no 85%" dos casos cos propietarios de terreos para o desenvolvemento de proxectos e remarca que o sector eólico xera máis de 7.000 empregos directos e indirectos, á vez que supón 581 millóns de euros, ao redor do 1%do PIB.
O BNG DENUNCIA A POLÍTICA "FRACASADA" DA XUNTA
Pola súa parte, a deputada do BNG Noa Presas criticou a política eólica "fracasada" da Xunta, que aposta por "un pelotazo" ao "servizo dos oligopolios".
Ademais, reprocha aos populares e ao Goberno galego que "quen mandan son as eléctricas" e "quen lexisla son vostedes", pois hai "unha barra libre de concesións sen garantías" a través de macroproxectos que se realizan como "miniproxectos" para "sortear trámites" ambientais.
En contraposición, Francisco Conde acusou ao Bloque de estar "en contra" da economía, industria e sector eólico.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.