Por E.P. | A CORUÑA | 11/12/2020 | Actualizada ás 14:47
O novo presidente da Autoridade Portuaria da Coruña, Martín Fernández Prado, fixou entre os seus retos dar "solución" á débeda deste organismo, contraída por obras do porto exterior, durante a súa toma de posesión nun acto que contou coa presenza do presidente da Xunta, Alberto Núñez Feijóo; o delegado do Goberno en Galicia, Javier Losada, e a alcaldesa, Inés Rei.
Xunto a eles, estivo tamén o presidente de Portos do Estado, Francisco Toledo, nun acto celebrado no Palacio de Congresos e Exposicións da Coruña, próximo á sede da Autoridade Portuaria.
No seu discurso, Fernández Prado apelou ao papel do porto na área metropolitana e dixo que será clave para "reactivar a reconstrución" tras a pandemia. No entanto, e ante a "débeda importante" que ten o porto, instou a traballar "entre todos", en referencia ás distintas administracións implicadas, para buscar "unha solución".
Sobre a débeda, o presidente da Xunta manifestou que todas as institucións son responsables de que o porto da Coruña "non crebe". "Temos o deber de volver retomar eses acordos", dixo tras aludir aos de 2004, asinados despois da catástrofe do 'Prestige' por Goberno, Xunta e Concello da Coruña. "E selalos de novo para evitar a quebra, a Xunta sempre respectou eses acordos e seguirao facendo", sentenciou.
Ademais, volveu a demandar a conexión por ferrocarril do porto exterior, que cualificou como un "desafío inaprazable". "Sen el non é un porto, senón unha chaira portuaria", expuxo.
PACTO DE CIDADE
Pola súa banda, a alcaldesa da Coruña, Inés Rey, avogou por revisar os acordos de 2004, liquidar os problemas financeiros do porto e lograr a conexión ferroviaria con Langosteira.
Tamén precisou que o consistorio coruñés convocou á Xunta, Portos do Estado, Adif, organismo portuario da Coruña e Deputación "para abordar de forma conxunta os pasos a seguir para impulsar o futuro do porto" e deseñar a fachada marítima. Neste sentido, instou a alcanzar un "pacto de cidade".
Pola súa banda, o delegado do Goberno en Galicia, Javier Losada, puxo ás autoridades portuarias como exemplo de cogobernanza e corresponsabilidade na xestión pública. "Fronte aos de 'España rompe', institucións como esta demostran a fortaleza e cohesión do noso país", aseverou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.