O Concello de Sada cre que á Xunta lle molesta "a memoria histórica e democrática" polo plan para Meirás
"A memoria non é un xardín", declara o alcalde da localidade en referencia á proposta de implantar un 'xardín da liberdade' no exterior do inmoble.
Por Europa Press / Redacción | A CORUÑA | 11/12/2020 | Actualizada ás 18:42
O Concello de Sada trasladou o seu rexeitamento ás 'Bases para o plan de usos das Torres de Meirás' presentado polo conselleiro de Cultura, Román Rodríguez, ao considerar que a Xunta vai "na dirección equivocada tanto no fondo como na forma".
"Respecto do fondo, porque o pazo, xa desde o decreto BIC do 2008 ata agora, integra dúas referencias históricas, a de Pardo Bazán e a do ditador Franco". "As dúas forman parte indisociable do pazo, da súa historia, dos seus antecedentes e dos futuros usos", sostén.
Segundo o alcalde de Sada, Benito Portela, "o señor Feijoo quere que só se fale de Pardo Bazán xa que lle molesta a memoria, sobre todo a histórica e democrática, do franquismo, da ditadura, da represión, o que supón unha didáctica parcial e interesada do pazo". "A memoria non é un xardín", declara en referencia á proposta de implantar un 'xardín da liberdade' no exterior do inmoble.
"Sen a referencia do franquismo, do que foi e representou a ditadura e, en particular, do propio pazo como símbolo e resultado do franquismo, estar a dar unha interpretación parcial e fraudulenta do pazo", engade.
ANUNCIO UNILATERAL
O rexedor cre que tamén se equivoca a Xunta de Galicia na forma "ao anunciar este documento de maneira unilateral, sen contar coas outras administracións", sinala en referencia ao propio concello, ao Goberno e a Deputación da Coruña. "E sen contar coas asociacións e entidades da memoria histórica e democrática", engade.
"Unha cooperación institucional debe un mínimo respecto polas outras administracións e pola propia sociedade civil". "Unicamente desde esa cooperación institucional, xunto á necesaria e imprescindible participación das entidades e asociacións da memoria histórica, poderase acordar os usos do pazo", engade.
Tamén lembra que á Xunta que, se ela ten as súas competencias, tamén as ten o Concello de Sada, "as urbanísticas como as de patrimonio cultural". Con todo, e a pesar do que cualifica como un "mal comezo" por parte de Feijóo, apostila que está a tempo de "rectificar".
