Por E.P. | Santiago de Compostela | 15/12/2020 | Actualizada ás 17:39
O Diario Oficial de Galicia (DOG) publica este martes o acordo da Comisión Bilateral de Cooperación entre o Goberno e a Comunidade que dá por resoltas as discrepancias entre ambas as dúas administracións pola Lei galega de ordenación farmacéutica, aprobada no ano 2019. As diferenzas centrábanse no título relativo ás unidades de radiofarmacia e á parte de publicidade de medicamentos.
Segundo o acordo que subscriben a ministra de Política Territorial, Carolina Darias, e o vicepresidente primeiro da Xunta, Alfonso Rueda, que difunde o DOG, as partes consideran liquidadas as súas diferenzas e comunican o acordo ao Tribunal Constitucional.
No que respecta ás unidades de radiofarmacias --a súa regulación, autoridade competente para a súa apertura e peche, ou dotación de recursos humanos, entre outras cuestións--, ambas as partes coinciden en considerar que "non contén regulación que innove" as previsións que, sobre o funcionamento das mesmas, se conteñen en lexislación previa.
Pero ademais, Galicia comprométese a que o desenvolvemento regulamentario que, no seu día, se aprobe dos citados preceptos, "non incidirá" en ningunha das cuestións xa reguladas na normativa estatal.
Sobre o artigo 74 da norma, que incumbe á publicidade, promoción e información dos medicamentos e produtos sanitarios, Xunta e Goberno ratifican que calquera clase de publicidade de medicamentos ou produtos sanitarios que se encarga á consellería competente "non se refire a ningunha forma de control previo, nin por tanto é reconducible á modalidade de autorización previa".
En coherencia co anterior, Galicia comprométese a "respectar" a dita interpretación en calquera desenvolvemento regulamentario propio posterior ao que o propio precepto alude en materia de procedemento.
E finalmente, remárcase que a regulación deste artigo 74 sobre publicidade de medicamentos, tanto no caso da orientada ao público en xeral como na orientada a profesionais sanitarios, débese "interpretar desde a perspectiva do pleno respecto" da competencia estatal en materia de regulación da publicidade de medicamentos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.