Outro gran fondo de investimento controlará o 49% das accións de Ence Energía
Trátase de Ancala Partners.
Por Europa Press / Redacción | MADRID | 18/12/2020 | Actualizada ás 12:38
Ence Energía e Celulosa e Woodpecker Acquisitions formalizaron o peche do contrato de compravenda polo que a entidade controlada por Ancala Partners LLP adquiriu unha participación minoritaria do 49% do capital social de Ence Energía, informou a compañía.
En concreto, o grupo presidido por Ignacio Colmenares, que ostentará o 51% do negocio de renovables, cobrou un prezo fixo inicial de 223 millóns de euros, despois dos axustes previstos no contrato de compravenda.
O cobro do prezo aprazado de carácter continxente cuxo importe máximo poderá alcanzar 134 millóns de euros está suxeito ao cumprimento de determinadas variables económicas vinculadas ao desenvolvemento de proxectos futuros nun prazo máximo de oito anos.
Así mesmo, ambas as entidades asinaron un acordo de socios nas condicións habituais deste tipo de acordos co fin de regular, entre outros aspectos, o goberno e a transmisión das participacións de Ence Energía, e a adopción dunha serie de decisións por parte do seu consello.
Con esta operación e coa venda da súa planta termosolar, completada esta mesma semana, Ence reforza o seu balance con 387 millóns de euros e pechará 2020 cunha débeda neta inferior a 200 millóns de euros e un cociente de débeda neta sobre Ebitda de 2,9 veces.
