A Xunta insiste en que pagará un seguro aos turistas para que "veña todo o mundo" ao Xacobeo
Rueda explica que enfrontarán "todos os gastos" que poidan derivar dun contaxio con fondos autonómicos.
Por Europa Press / Redacción | SANTIAGO DE COMPOSTELA | 20/12/2020 | Actualizada ás 18:51
Máis dun centenar de concellos delegaron xa na Xunta a tramitación das sancións por incumprimentos de medidas relacionadas coa pandemia, segundo expuxo o número dous do Goberno galego, Alfonso Rueda, nunha entrevista este domingo en Radio Nacional. Alí, o vicepresidente primeiro asegurou que en só dez días desde a firma do convenio coa Fegamp, "máis de cen concellos" acolléronse á opción de que a tramitación destes expedientes recaia en mans da Administración autonómica.
Tamén deu cifras sobre as solicitudes para as axudas aos negocios de hostalaría, un dos sectores máis golpeados pola pandemia ao centrar gran parte das restricións para evitar contagios. Neste sentido, apuntou que a Xunta recibiu "máis de 40.000 solicitudes" entre as dúas primeiras convocatorias destas subvencións e que a Administración autonómica estuda xa ampliar no caso de que sexa necesario durante o inicio do ano 2021.
XACOBEO 2021
Un ano no que Galicia celebra o Xacobeo once anos despois, aínda que a cita estará marcada pola pandemia de coronavirus. En canto a isto, o dous da Xunta incidiu en que a ampliación a 2022 do evento "non corresponde" ás institucións senón á Igrexa. "Todos os argumentos que cremos que son de peso xa os trasladamos. Pero o feito de que poida haber Xacobeo no ano 2022 non pode esconder o feito de que o Xacobeo no 2021 vai ser seguro", incidiu Rueda.
Neste sentido, defendeu a importancia do seguro para viaxeiros que a Administración autonómica prevé activar nos primeiros meses de 2021. Este seguro, segundo comentou, cubrirá con fondos da Xunta "todas" as continxencias ante problemas derivados por contaxios. Todo iso para "que veña todo o mundo" a Galicia e que a pandemia non supoña un problema para visitar a Comunidade galega durante o próximo ano.
