Comeza a aliviarse a situación de contaxios nas residencias
Baixan a pouco máis dun cento os maiores coa Covid.
Por Europa Press / Redacción | SANTIAGO DE COMPOSTELA | 21/12/2020 | Actualizada ás 13:14
O goteo continuo de altas entre usuarios das residencias de maiores, superior aos novos casos detectados, mantén á baixa este luns a cifra de casos covid-19 nestes centros en Galicia, que contabilizan un total de 108 residentes infectados, 10 menos que hai 24 horas.
Así figura no último parte diario facilitado pola Consellería de Política Social, que informa de catro novos positivos detectados entre usuarios, todos eles na residencia de maiores de Vimianzo.
Pola contra, retíranse do cómputo por negativizar dous usuarios da residencia San Salvador de Guntín e outros dous de San Antonio de Beariz, así como un maior do Asilo de Vilalba. Tamén foron dados de alta oito usuarios da residencia Pontevedra de Vilaboa e un da vivenda comunitaria Castrelo de Miño.
Con esta actualización, a residencia Soremay de Pontevedra volve ser o centro con máis casos activos en Galicia, con 18, seguida do CRAPD Vigo II, con 14, e a residencia Pontevedra de Vilaboa, con 12.
O resto de residencias mantense por baixo da decena de casos, coa Saleta de San Cristovo de Cea e Conde de Gondomar con 9. Séguenlles a Cesantes de Redondela (8), a San José de Narón (7) e a DomusVi Vigo (7). Tanto a San José de Beariz como a DomusVI Vimianzo teñen cinco positivos.
Así mesmo, hai catro anciáns con coronavirus en Monte Tecla da Guarda, tres en Nosa Señora das Virtudes de Pontedeume, dous en Vivenda Comunitaria de Castrelo de Miño, e un, respectivamente, en Asilo Vilalba, residencia Servisenior de Brión, na San Cibrao de Cervo, San Salvador de Guntín e no CRAPD Vigo I.
TRABALLADORES DE RESIDENCIAS
Con respecto aos traballadores de centros xeriátricos, o cómputo global mantense en 125. Na última xornada detectouse un novo caso na residencia de maiores de Vimianzo e no Padre Rubinos da Coruña, mentres que se deu de alta a un empregado da San Salvador de Guntin e a outro de Santa Teresa Jornet da Coruña.
