Por E.P. | SANTIAGO DE COMPOSTELA | 21/12/2020 | Actualizada ás 19:38
A portavoz do BNG en Europa, Ana Miranda, cifrou en 1.400 millóns de euros os fondos europeos que a Xunta deixa "sen gastar" e criticou que isto ocorra "nunha situación de pandemia, na que as necesidades da sociedade galega son múltiples".
Neste contexto, Miranda lembrou nunha nota de prensa que a aprobación do marco orzamentario da Unión Europea para o período 2021-2027 establece mecanismos de control sobre o correcto uso dos fondos comunitarios, algo que podería supor "unha forte penalización para Galicia por culpa da mala xestión do Goberno do PP".
"Que Galicia malgaste ou non gaste eficazmente fondos europeos supón dúas cousas: que Feijóo é un pésimo xestor e que ao PP non lle importa solucionar os problemas da sociedade galega", censurou a nacionalista, quen considera que o presidente da Xunta debe "explicar por que" deixa estas partidas "sen gastar".
Ademais, Ana Miranda pregunta ao Goberno galego por que "non facilita a participación" dos concellos na toma de decisións sobre os fondos de reconstrución e censura a súa "falta de transparencia" na selección dos proxectos que poden optar a eles. "A Xunta fala de 108 proxectos que poden mobilizar 9.400 millóns de euros como candidatos aos fondos 'Next Generation, pero non sabemos en función de que criterios foron seleccionados, nin se quedaron proxectos fóra, nin quen os seleccionou", apuntou.
SILICOSE
Por outra banda, o Bloque insta o Goberno estatal a adoptar as medidas "necesarias" que solucionen os problemas do sector da extracción e transformación da pedra --granito e laxa, principalmente--. Neste sentido, o seu deputado no Congreso, Néstor Rego, mencionou a "necesidade" de que se recoñeza a situación de incapacidade total dos traballadores diagnosticadas de silicoses de primeiro grao, xa que "non poden acceder a outro posto de traballo exento de risco de exposición á inhalación do po silicótico".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.