Colexios de médicos e enfermaría piden reforzar Atención Primaria para a vacinación da Covid
Sanidade trasladoulles o contido da súa proposta, que prevé vacinar nunha primeira fase a 40.000 persoas
Por Europa Press / Redacción | SANTIAGO DE COMPOSTELA | 21/12/2020 | Actualizada ás 19:09
Os colexios de médicos e de enfermaría de Galicia trasladaron o seu apoio ao plan de vacinación fronte á Covid que lles expuxo, por videoconferencia, o conselleiro de Sanidade, Julio García Comesaña, nunha reunión xunto ao xerente do Sergas, José Flores. No entanto, desde o colectivo de enfermaría reclamaron reforzar a Atención Primaria para que non se vexa afectada os profesionais que se destinarán á campaña de vacinación.
A semana pasada, o Executivo galego xa se reuniu coas organizacións sindicais presentes na Mesa Sectorial para explicarlles o plan. Está previsto así mesmo, que, ao longo deste martes, Sanidade explique o mesmo ás sociedades científicas.
Despois de manter estas reunións, Julio García Comesaña destacou a "receptividade" coa que estes colectivos acolleron o plan, aprobado na última reunión semanal do Executivo galego. Del, lembrou que contará "cun equipo con máis de 200 profesionais de enfermaría para coordinar a campaña". "O obxectivo da Xunta será vacinar, nun primeiro estadío, a 40.000 cidadáns".
Ademais, indicou que a campaña comezará nos colectivos considerados prioritarios. "Así, os primeiros en facelo serán os ao redor de 22.000 usuarios das residencias de maiores e de atención a grandesdependentes; os preto de 17.000 traballadores destes centros sociosanitarios e os case 3.000 traballadores sanitarios que están en primeira liña".
ACOLLIDA FAVORABLE
Desde o Consello Galego de Colexios Médicos, o seu presidente e máximo responsable da entidade colexial de Pontevedra, Isidro Lago, cualificou de "correcto" a formulación feita desde Sanidade. Tamén considerou un "bo criterio" o que se dividan as 80.000 doses que, segundo apuntou, chegarán a Galicia ao ter que dar unha segunda dose aos 21 días.
Pola súa banda, os colexios de enfermaría de Galicia coincidiron en que é o momento de falar "un mesmo idioma para que a poboación poida entendernos", resumiu a Europa Press a presidenta da entidade colexial de Ourense, Ascensión Pérez, que explicou que a formulación é comezar a vacinación "o día 27 e en todos os lugares", dixo sobre os primeiros beneficiarios.
