Por Europa Press / Redacción | SANTIAGO DE COMPOSTELA | 22/12/2020 | Actualizada ás 20:18
A deputada do BNG Noa Presas acusou á Xunta de "tomar a pitorreo" ao Parlamento galego pola falta de información sobre os proxectos que optan a fondos europeos. En cambio, o deputado do PPdeG Miguel Tellado defende a "confidencialidade" destas iniciativas para a súa competitividade.
A proposta do Bloque, exposta este martes no pleno do Parlamento --votarase o mércores--, reclama que a Xunta remita á Cámara "no prazo de tres días" toda a información referente a proxectos e as notificacións enviadas institucións europeas e estatais. Tamén require a súa xestión directa en Galicia, así como remitir á Cámara para o seu debate diferentes cuestións como a contía que corresponde a Galicia de fondos europeos da covid, entre outras cuestións.
E é que lamenta que a oposición "non sabe nada" dos 108 proxectos dos que fala o Goberno galego, mentres as universidades "non teñen reservado un papel".
En cambio, Tellado defendeu que "ninguén fai público" os proxectos "ata que se coñeza o regulamento de repartición de fondos", polo que se debe "velar pola súa confidencialidade" para que "sexan competitivos na contorna da UE". Ademais, o popular sostén que os nacionalistas "necesitan unha escusa para culpar á Xunta do que vai facer o Goberno de Pedro Sánchez" e opina que o BNG é un "cómplice necesario" da "traizón" do PSOE a Galicia.
CRÍTICAS DO BNG EN MADRID
Por outra banda, o BNG censurou que o Partido Popular, o PSOE e Unidas Podemos rexeitasen en Madrid as transferencias dos centros do Instituto Oceanográfico a Galicia, unha medida que si apoian no Parlamento de Galicia.
Nun comunicado remitido aos medios, o BNG explica que unha proposición non de lei presentada polo deputado Néstor Rego foi rexeitada na Comisión de Ciencia, Innovación e Universidades do Congreso cos votos en contra de PP, Vox, Cs e a abstención dos partidos de goberno, PSOE e Unidas Podemos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.