Por E.P. | SANTIAGO DE COMPOSTELA | 23/12/2020 | Actualizada ás 13:54
O Parlamento galego instou á Xunta, tras unha proposta do PPdeG --apoiada polo BNG, con abstención de PSdeG--, para que reclame ao Goberno central a inclusión dunha partida de, polo menos, 30 millóns de euros no Orzamento Xeral do Estado (PGE) de cara á promoción do Xacobeo 2021.
No pleno da Cámara, o deputado popular Borja Verea subliñou que os PGE "destinan cero euros ao Xacobeo", no que tacha de "anomalía". "Non atopamos unha explicación racional para que o maior evento turístico nacional non sexa apoiado polo Goberno de Pedro Sánchez", lamenta.
A este respecto, Verea saca a conclusión "terrible" de que a explicación de que non se apoie ao Xacobeo é porque na Comunidade goberna o PP, nunha "acción política deliberada contra Galicia e os galegos". "Hai tempo de corrixir esta situación", agrega. Así, considera que o Ano Santo "chega cando máis o necesita o país", de forma que se converte en "unha oportunidade" que "a Xunta vai aproveitar". Para iso, lembra que se destina unha partida de 85 millóns, aínda que recoñece que será un Xacobeo "difícil, diferente e incerto" polo contexto de pandemia.
ABSTENCIÓN DO PSOE
En cambio, a deputada Leticia Galego (PSdeG) defendeu que hai "un compromiso" do Goberno central de 90 millóns para os próximos anos con 150 actuacións en proxecto e en execución. Entre eles, subliñou, este ano destínanse 20,5 millóns e en 2021 serán 40,5 millóns para actuacións en concellos polos que pasa o Camiño.
Tamén expuxo que Executivo central destinou uns 20 millóns de euros nos últimos anos para as obras de restauración da Catedral de Santiago. Ademais, afeou que a uns días do comezo do Xacobeo se descoñeza a programación da Xunta para este evento. Espera que a súa actuación vaia máis aló de "iluminar uns monumentos de azul e amarelo".
APOIO DO BNG
O deputado do BNG Daniel Pérez dixo que non comparte a "obsesión" da Xunta con querer identificar Galicia co Xacobeo "ata o paroxismo". Con todo, explicou que o Bloque está a favor de que o Goberno invista máis en Galicia, "tamén no Xacobeo". Con todo, avisa de que o Ano Santo "non é a solución única ao turismo", e "menos nun ano con tantas incertezas", polo que pide un "cambio de modelo" en relación a este sector e "diversificar propostas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.