Por Galicia Confidencial | SANTIAGO DE COMPOSTELA | 27/12/2020 | Actualizada ás 10:00
Aínda cando queda claro que o Nadal deste ano 2020 será celebrada de xeito atípico, hai unha ampla serie de actividades que seguen a ter lugar, en liña coa estela dos últimos anos. Unha delas é a recuperación e coidado do patrimonio tradicional galego, que nestes días conta cun dos seus principais expoñentes na figura do apalpador; figura cuxa recuperación se viu envolta en polémica nas redes sociais.
A Rede do Patrimonio Cultural vén de se sumar a esta dinámica de coidar o propio ampliando as súas tarefas de conservación e recuperación a unha serie de "rituais" que "durante moito tempo foron a protección de casas, familias e colleitas". Refírense así, entre outros, aos xogos tradicionais galegos; actividades que, en moitos casos, atópanse hoxe relegadas ao esquecemento ou que perviven só na memoria dos máis maiores.
Para devolvelas á actualidade do día de hoxe, a Rede vén de anunciar que lanzará "unha pequena escolma" de xogos tradicionais en formato de vídeo. Estes serán publicados ata o día 5 de xaneiro, cando finalizará unha serie en colaboración co Observatorio Lúdico Galego. O primeiro capítulo destas actividades, disposto debaixo, está xa dispoñible na páxina de Facebook da Rede.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.