O Goberno central reivindica o "escudo social" creado en Galicia durante a pandemia
O delegado do Goberno avanza máis compromiso institucional do Executivo para "modernizar Galicia" en 2021.
Por E.P. | SANTIAGO DE COMPOSTELA | 30/12/2020 | Actualizada ás 15:41
O delegado do Goberno en Galicia, Javier Losada, explicou no seu balance do ano 2020, que o Executivo central respondeu ao coronavirus "con todos os medios ao seu alcance" para lograr dous obxectivos: frear a pandemia, en termos sanitarios, e "levantar un escudo social" para que ninguén quede atrás debido á crise derivada da covid-19.
Respecto dese "escudo social", Losada detallou que ata 165.038 traballadores por conta allea, 95.938 por conta propia e 35.177 empresas beneficiáronse das diferentes liñas de axuda --ERTE, axudas para persoas autónomas e avais do Instituto de Crédito Oficial (ICO)-- outorgadas polo Goberno.
Losada explicou que o Executivo central achegou 1.193,4 millóns de euros en prestacións sociais e que outros 5.374,9 millóns de euros, vinculados á Liña de Avais do Instituto de Crédito Oficial (ICO), foron mobilizados para empresas galegas.
Ademais, o delegado do Goberno en Galicia destacou a "cogobernanza e cooperación" coa Xunta de Galicia, que "se traduciu en 734,9 millóns de euros transferidos ao Goberno autonómico para compensar os gastos sanitarios, apoiar o esforzo educativo e compensar a baixada da actividade económica". Lembrou ademais que, a estas cantidades, súmanse os 272 millóns para sanidade dos Fondos FEDER europeos e os 441 millóns doutros fondos procedentes da Unión Europea.
Doutra banda, Losada indicou que, ademais da resposta social á crise da covid-19, o Goberno central foi capaz de "cumprir" outros compromisos históricos en Galicia, como a finalización das obras do AVE e a recuperación, "polo menos provisional", do Pazo de Meirás.
