'Dígochoeu', o proxecto educativo da CRTVG sobre o uso do galego, fai un ano
A compañía asegura que é un dos contidos que máis visualizacións recibe nas redes sociais.
Por E.P. | SANTIAGO DE COMPOSTELA | 31/12/2020 | Actualizada ás 13:40
O proxecto educativo da CRTVG en torno ao galego '#DígochoEu' fai un ano de vida o 1 de xaneiro, con "miles de seguidores", segundo informa a compañía.
Cun formato "divertido e dinámico", a xornalista Esther Estévez "convida a falar mellor en galego nun vídeo que propón unha palabra incorrecta, de uso común, e ofrece sinónimos e consellos" para darlle un cambio a esas expresións.
Esta iniciativa naceu dentro da web dos servizos informativos, "onde pronto se situou como un dos contidos máis visualizados cada semana", destaca a CRTVG.
Da web deu o salto á pantalla dos telexornais e este outono chegou a TikTok, "onde poden verse contidos extra". Dende a CRTVG explican que "en tan só catro meses en TikTok, #Digochoeu chegou aos 35.000 seguidores", remarca a compañía que asegura que os vídeos se aproximan ao cinco millóns de visualizacións.
Actualmente, pode verse na web crtvg.gal, en g24.gal, así como nas contas de Instagram (@g24noticias), Twitter (@g24noticias), Facebook (g24noticias), Youtube (youtube.com/tvg) e TikTok (tiktok.com/@digochoeu) e no telexornal da TVG.
