Por E.P. | Santiago de Compostela | 08/01/2021 | Actualizada ás 14:51
O alcalde de Santiago de Compostela, Xosé Sánchez Bugallo, fixo balance este venres da situación da covid-19 na cidade --especialmente do seu impacto nas festas do Nadal-- e indicou que, vistos os datos non só da capital galega, senón tamén de concellos limítrofes como Ames ou Teo, "con datos iguais ou superiores aos de Santiago", o peche perimetral de Compostela "non funcionou como se desexaba".
"O peche de Santiago non foi operativo, xa que hai moitas persoas doutros concellos que traballan e/ou estudan aquí", explicou o alcalde, que subliñou que os datos "non xustifican o sacrificio realizado, especialmente polo comercio e a hostalaría".
Nesta liña, Bugallo indicou que Santiago é "unha das cidades galegas máis afectadas pola crise do coronavirus", non só pola sanitaria, senón tamén pola económica.
"O pequeno e mediano comercio viu reducido as súas vendas por dous motivos: o descenso do turismo e a non mobilidade dos concellos próximos", explicou o alcalde, que tamén lamentou que "a colaboración ofrecida polo Concello para paliar unhas consecuencias tan severas non é suficiente".
Respecto da evolución dos contaxios, o rexedor compostelán mostrou a súa preocupación ante o continuo crecemento de positivos. "Onte rexistráronse 272 positivos, e é previsible que sigan crecendo ata, polo menos, mediados de mes, cando saian á boia todos os casos que se produciron durante o nadal", sinalou Bugallo.
"MEDIDAS ACERTADAS E EFICACES"
"Non quero ser crítico porque isto non é unha ciencia exacta, pero espero que a Consellería de Sanidade e o comité clínico tomen medidas acertadas e eficaces para non ir a peor, e que teñan en conta o impacto destas decisións en sectores que necesitamos que sigan vivos", desexou o alcalde, que reiterou a colaboración do goberno local "para facer cumprir as medidas".
Sánchez Bugallo opinou tamén sobre a distribución das vacinas contra a covid-19, cuxo atraso na aplicación cre que se solucionará "con rapidez"; non así as dificultades das empresas para abastecer as necesarias, un problema ao que non lle ve "tan fácil solución".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.