Por E.P. | SANTIAGO DE COMPOSTELA | 08/01/2021 | Actualizada ás 16:21
O vicepresidente primeiro da Xunta, Alfonso Rueda, reivindicou este venres, mentres se preparan novas restricións para o sector, o avance no pago das axudas comprometidas pola Administración autonómica para a hostalaría e o lecer nocturno.
En concreto, nun acto en Marín, concretou que a Xunta xa abonou ao sector do lecer nocturno 84% das axudas aprobadas para sufragar os gastos de aluguer e que establece contías máximas de 20.000 euros por beneficiario.
Deste xeito, xa se abonaron 175 solicitudes das 207 aceptadas e con toda a documentación requirida, por un importe de máis de 553.600 euros. Desde a publicación da orde de axudas recibíronse 287 solicitudes, das que 43 foron excluídas por non reunir os requisitos da convocatoria e outras 35 por non enviar os xustificantes requiridos ou por renunciar a axuda. Deste xeito, estarían en disposición de pago 209 solicitantes, dous deles pendentes de enviar toda a documentación necesaria, cuxo prazo finaliza este sábado.
A Xunta contribúe así a sufragar os custos de aluguer dos locais de lecer nocturno que permanecen pechados, excepto as terrazas, desde o pasado 15 de agosto polas restricións sanitarias para conter o coronavirus. Isto é, discotecas, pubs, cafés-espectáculo, salas de festas, así como as salas de concertos que desenvolvan as súas actividades de forma análoga aos anteriores.
Segundo incide a Xunta, trátase dunha das medidas do Plan de reactivación de lecer nocturno, que no marco da canle diálogo directo co sector, inclúe tamén axudas para o mantemento do emprego e para a celebración de concertos cando sexa posible segundo a situación epidemiolóxica.
ATA 20.000 EUROS
As axudas ao aluguer van destinadas aos titulares de establecementos de lecer nocturno que teñan contrato de aluguer en vigor desde xaneiro de 2020 e que deberán estar vixentes durante un ano desde que se permita a reapertura do sector, co compromiso de manter a actividade durante ese período. A contía, que chegará a todos os que as soliciten e cumpran os requisitos, variará en función do importe mensual do aluguer e pode conseguir ata os 20.000 euros.
O vicepresidente primeiro da Xunta lembrou tamén que a hostalaría conta cunha liña específica de apoio no marco do Plan de Rescate, dotado con 86 millóns de euros, para autónomos, microempresas e sector da hostalaría. Nesta liña, destacou que xa se abonaron máis de 60 millóns do 76% das solicitudes.
Mentres a evolución epidemiolóxica apunta que en breve haberá novas decisións que afectarán o sector, Rueda esgrimiu que a Xunta seguirá mantendo o diálogo cos seus representantes. Iso si, co foco no Goberno central, ao que xa anteriormente urxiu a adoptar medidas fiscais que favorezan ao sector, volveu a reclamar a "implicación" do Executivo que dirixe Pedro Sánchez, e tamén do "resto de administracións".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.