Por Europa Press / Redacción | Santiago de Compostela | 08/01/2021 | Actualizada ás 18:37
A terceira onda da covid-19 xa se deixa notar. O conselleiro de Sanidade, Julio García Comesaña, chamou aos galegos a "autoconfinarse" e a saír só da casa para "cuestións esenciais" ante o incremento de contaxios que se rexistra en Galicia tras o Nadal.
Despois da reunión do subcomité clínico que asesora á Xunta na xestión da pandemia, o titular de Sanidade advertiu da "desmotivación ante as medidas de prevención".
"A percepción do risco sobre a gravidade da enfermidade no caso de contaxiarse reduciuse", asegurou o conselleiro que, aínda que recoñeceu que "está a ser unha loita longa", incidiu na necesidade de "non perder o medo" e de "non relaxarse".
O conselleiro pediu aos cidadáns "esforzo" para "loitar contra a terceira onda". "Temos que facer unha especie de autoconfinamiento nestes días, non saír de casa máis que por cuestións esenciais, limitar a nosa interacción social, limitar a nosa mobilidade", sinalou como medida para "tratar de frear" o avance dos contaxios.
"Contra esta fatiga pandémica só podemos insistir en que seguimos en alerta e que isto aínda non terminou", engadiu.
"PREOCUPACIÓN" POLOS CONTAXIOS TRAS O NADAL
O conselleiro mostrou a súa "preocupación" polo aumento dos casos positivos de covid-19 en Galicia tras as celebracións de Nadal en Galicia".
"Galicia rexistrou no período do Nadal 2.513 sancións por incumprir as limitacións. É un dato para a reflexión, houbo festas, houbo botellóns, os que menos, pero suficientes para expandir a covid-19 como demostran os datos destes últimos días", manifestou.
Tras iso, agradeceu o "esforzo" de "quen está a cumprir" e lamentou "profundamente" que outros non cumprisen as normas.
LEMBRA AS RECOMENDACIÓNS DA XUNTA
Preguntado por se o incremento dos contaxios garda relación coa relaxación das medidas durante esta época, o conselleiro lembrou que a Xunta e o propio comité clínico insistiron "moito" "nunha serie de recomendacións básicas" que se deberían respectar, como a de "gozar as festas unicamente con convivientes".
"Estamos seguros e temos certezas de que moitos galegos e galegas seguiron esta recomendación e así o fixeron, pero tamén temos evidencias agora, facendo estudo destes casos, que un número importante de xente, polo menos tanta como casos positivos, non o fixeron así", sinalou.
E é que, segundo indicou, do estudo dos casos están a descubrirse comidas familiares de "máis de dúas unidades convivientes". "Estes son datos constatables, que estamos a ver. Por fortuna non vemos máis porque cremos que unha parte importante dos galegos pasaron o Nadal como lle recomendaban os expertos e a Xunta, na súa casa cos seus familiares", incidiu.
PECHE PERIMETRAL AMPLIADO
Galicia permanecerá pechada perimetralmente ata finais do mes de xaneiro, período no que se intensificará o control da fronteira co norte de Portugal ante a situación epidemiolóxica desta rexión do país luso.
Trátase dunha das medidas acordadas no subcomité clínico para a xestión da pandemia en Galicia, que na súa reunión deste venres decidiu ampliar ata final de mes o peche perimetral que estaba decretado ata o 11 de xaneiro.
Deste xeito, non se poderá entrar nin saír do territorio galego agás por motivos xustificados. O foco, segundo detallou o conselleiro de Sanidade, estará na fronteira con Portugal debido ao impacto da pandemia no norte luso.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.