Universitarios de Galicia recollen firmas para suspender os exames presenciais e que se fagan 'en liña'

A evolución da pandemia no territorio levou a diversos estudantes das tres universidades galegas a impulsar iniciativas nas que reclaman a estas institucións que se suspendan os exames presenciais previstos para este mes e nas próximas semanas.

Varios destes alumnos impulsaron varias campañas de recollida de firmas a través da plataforma 'Change.org' dirixidas ás universidades da Coruña, Santiago e Vigo, que suman xa preto de 3.000 apoios para que se substitúan estas probas de carácter presencial por outras en modalidade 'en liña'.

En concreto, argumentan que a situación da COVID-19 "se agrava" en todo o territorio e que o pasado mércores se rexistraron "case 700 contaxios".

"A Coruña xa é a área sanitaria mais afectada da comunidade", insisten, polo que piden á universidade que os exames se realicen de maneira "totalmente telemática e por tanto, a presencialidade destes se vexa suspendida".

"Moitos dos estudantes da UDC conviven con persoas de risco e existe un medo xeneralizado entre o alumnado xa que consideramos insuficientes as medidas tomadas pola UDC durante o primeiro cuadrimestre e vémonos preocupados ante esta entrada a unha posible nova onda de casos".

Esta situación repetiuse noutras comunidades autónomas do país, nas que se advirte da mala evolución das cifras de contaxios tras as festividades de Nadal.