Protesta dos hostaleiros santiagueses para este luns diante da residencia do presidente da Xunta en Monte Pío
As organizacións convocantes censuran que as medidas fosen aplicadas sen antelación, xa que foron postas en coñecemento da cidadanía nunha rolda de prensa na tarde do venres e entraron en vigor na medianoite do sábado.
- Malestar entre a hostalaría durante a primeira xornada de aplicación das novas restricións
- Segue a presión sobre a hostalaría, a Xunta baralla pechar locais en concellos moi afectados pola COVID
Por E.P. | SANTIAGO DE COMPOSTELA | 10/01/2021 | Actualizada ás 19:37
Os hostaleiros de Santiago, convocados polas asociacións Hostalaría Compostela e Bares, Pubs e Discotecas de Compostela, convocaron para este luns unha concentración ante a residencia oficial do Presidente da Xunta no Monte Pío da capital galega. A mobilización ten como obxectivo mostrar o seu desacordo polas novas restricións á hostalaría en Santiago impostas pola Administración autonómica e que o sector considera "un peche encuberto".
En concreto, os negocios de hostalaría de Santiago, así como os de Teo e Ames, teñen desde a madrugada do sábado 9 de xaneiro a obrigatoriedade de pechar ás 18,00 horas tras elevarse na capital galega e os municipios limítrofes as restricións ao grao medio-alto, que ademais implica a prohibición do consumo no interior dos locais.
As organizacións convocantes da protesta censuran que as medidas fosen aplicadas sen antelación, xa que foron postas en coñecemento da cidadanía nunha rolda de prensa na tarde do venres e entraron en vigor na medianoite do sábado. Así, os hostaleiros santiagueses censuran o "peche encuberto" do sector, para o que reclaman compensacións económicas ante a situación "límite" que atravesan "cunha diminución dos ingresos do 80% e coas axudas sen cobrar".
