Rexistrado un brote con 25 contaxios nunha residencia en Verín, o número total de casos é de 280 en Galicia
Os contaxios comezaron a aumentar desde o día 27 de decembro cando comezou a campaña de vacinación nas residencias.
- Aumentan os casos activos en residencias con 235 novos contaxios en centros da Pastoriza, Xove e Tui
Por Europa Press / Redacción | SANTIAGO DE COMPOSTELA | 10/01/2021 | Actualizada ás 20:44
Os casos de covid-19 entre usuarios de residencias de maiores manteñen este domingo a súa tendencia á alza e son xa máis do dobre dos que había fai 14 días, xornada na que comezou en Galicia a vacinación contra o coronavirus nun centro residencial de Santiago.
O último balance da Consellería de Política Social informa de 49 novos positivos, 25 deles nun novo brote que afecta á residencia Fogar Santa María de Verín. Deste xeito, os casos en residencias de maiores multiplicáronse respecto das cifras previas ás festas do Nadal. E é que o día 23 de decembro baixaban os casos activos por baixo da centena por primeira vez na segunda onda da pandemia.
Desde o día de Noiteboa, no que rompeu unha tendencia á baixa sostida durante o mes de decembro, os casos han ido en aumento. O domingo 27 de decembro, día no que se vacinaron ás primeiras persoas en Galicia, contabilizábanse 114 casos activos. Dúas semanas despois o número de usuarios de residencias con enfermidade activa disparouse e son xa 280, 166 máis que hai dúas semanas, o que supón un incremento do 145%.
49 NOVOS POSITIVOS
Política Social informa este domingo da detección de 49 novos positivos entre usuarios de residencias: 25 no citado brote de Verín, 10 na DomusVi de Vimianzo, 12 na Residencia Paz e Ben de Tui e outros 2 na San Bartolomeu de Xove.
Pola súa banda, o departamento autonómico saca do cómputo catro persoas por negativizar nas probas diagnósticas: dous da San Sebastián e San Lázaro de Ribadeo e outras dúas na San Bartolomeu de Xove. Deste xeito, a residencia DomusVi de Vimianzo continúa como a que ten máis casos activos de covid-19 entre os usuarios e suma xa 82. Seguen a esta a xeriátrico Paz e Ben de Tui, con 51 anciáns infectados, e o da Pastoriza, con 36.
A San Bartolomeu de Xove conta con 25 maiores afectados, mesmo número que contabiliza o centro Fogar Santa María de Verín. A residencia de Ribeira continúa con 19 e o Hospital Asilo de Ribadeo descendeu ata os 14 que figuran na actualización deste domingo.
Por baixo da decena están o centro Santa Teresa Jornet da Coruña, con seis positivos; A Saleta de San Cristovo de Cea, con catro; o CRAPD Vigo II, con outro catro; e a residencia de Burela, a Vila do Conde de Gondomar e os Apartamentos Tutelados San Bartolomeu de Xove, cun caso cada un.
Pola súa banda, os centros de atención á discapacidade (CAPD) mantéñense sen usuarios afectados, pero si que hai catro traballadores contaxiados --mesma cifra que un día atrás--. Así, hai dous positivos no persoal do CAPD da Coruña, un na residencia de adultos Pai Menni de Betanzos e outro no Fogar San Rafael de Vigo.
