A presión hospitalaria polo coronavirus obriga a suspender operacións non urxentes en Galicia
Xa se suspenderon algunhas intervencións en hospitais da Coruña, Ferrol e Santiago.
Por Europa Press / Redacción | Santiago de Compostela | 14/01/2021 | Actualizada ás 18:46
Os responsables sanitarios galegos comezaron esta semana a suspender algunhas operacións non urxentes pola presión hospitalaria derivada da covid-19, co obxectivo de deixar camas libres para posibles ingresos.
En concreto, fontes sanitarias confirmaron que xa se suspenderon algunhas intervencións no Hospital da Coruña, Ferrol e Santigo e que, dependendo que como evolucionen as cifras, é posible que nas próximas semanas haxa que aprazar novas operacións.
Son, en todo caso, intervencións non urxentes, sen "risco vital", polo que están totalmente garantidas as operacións de urxencias e do ámbito oncolóxico, explicaron.
Os adiamentos afectan a operacións non urxentes que, no seu postoperatorio poden requirir o uso de camas de críticos. Con iso, garántese que estas camas estean dispoñibles na medida do posible por se fosen necesarias para pacientes covid.
Nas áreas de Santiago e A Coruña, explicou Sanidade, os quirófanos reprogramados serán usados para facer procedementos de cirurxía maior ambulatoria --que non require ingreso--, podendo "aumentar incluso o número de pacientes operados". O resto da actividade cirúrxica "continúa con normalidade".
A evolución da covid-19 en Galicia tivo un patrón negativo nas últimas dúas semanas, o que obrigou á Xunta a tomar máis medidas restritivas para tratar de frear as cadeas de contaxio.
O efecto máis negativo deste proceso é o continuo incremento da presión hospitalaria, o que levou a responsables como a da área da Coruña a cancelar intervencións menores para deixar marxe ás posibles necesidades de camas de hospitalización que poida haber nos próximos días ou semanas.
