As exportacións galegas seguen resistindo o envite da crise mellor que o conxunto do Estado
Descenden un 0'4% fronte ao 1'3% da media.
Por E.P. | SANTIAGO DE COMPOSTELA | 21/01/2021 | Actualizada ás 13:08
As exportacións galegas baixaron un 0,4% en novembro en relación co mesmo mes do ano anterior, mentres que no conxunto estatal a diminución foi do 1,3%, segundo os datos que publican este xoves tanto o Instituto Galego de Estatística (IGE) como o Ministerio de Industria, Comercio e Turismo.
As exportacións de pezas de vestir non de punto son as que teñen unha maior repercusión negativa nesta variación interanual negativa da comunidade galega. Mentres, as importacións diminuíron un 8,8% en taxa interanual, debido sobre todo á redución nas de combustibles e aceites minerais. No conxunto estatal, as importacións caeron un 5,9%.
No conxunto estatal, as exportacións españolas de mercadorías alcanzaron os 238.414 millóns de euros de xaneiro a novembro de 2020. Como resultado, o déficit comercial do once primeiros meses do ano pasado alcanzou os 12.349 millóns, un 58,7% menos que o rexistrado no mesmo período de 2019.
En Galicia, as exportacións roldaron os 2.102,6 millóns de euros, mentres que o valor das importacións situouse nuns 1.560,9 millóns.
