Detectado un gromo de covid-19 entre pacientes de diálise na Coruña

Un brote afecta a 11 pacientes que realizan as súas sesións de diáñise nos hospitais privados Quirón e San Rafael da Coruña, derivados do Servizo Galego de Saúde (Sergas). O tesoureiro da Asociación Galega de Técnico en Emerxencias Sanitarias, Iván Vázquez, explica que un paciente de diálise foi o que avisou de que dera positivo nunha PCR a un técnico de emerxencias que conduce unha ambulancia de transporte colectivo xunto a outros usuarios.

Segundo indica, o paciente deu positivo nun cribado realizado para asistir a diálise. Ao chegar a casa, recibiu o resultado, e entón avisou do positivo ao técnico da ambulancia que traslada a estas persoas desde o hospital ata o seu domicilio --e que neste caso mobilizou a esa persoa por necesitar cadeira de rodas--.

A Asociación Galega de Técnico en Emerxencias Sanitarias asegura que nese traslado de 40 minutos ían cinco doentes máis, nun espazo inferior a tres metros cadrados.

Así, esta entidade reclama que se melloren os protocolos de actuación á hora de notificar os positivos das persoas trasladadas en ambulancia, á vez que se queixa de que non se considere contacto estreito a este traballador.

A METADE DOS INFECTADOS, TRANSPORTADOS EN AMBULANCIAS

Pola súa banda, a empresa Servizos Sanitarios da Coruña, que se encarga deste servizo de traslado de pacientes de diáleses, sostén que só a metade destes pacientes viaxaron nas súas ambulancias, pero "non compartiron" vehículo entre eles.

Ademais, asegura que "se constatou que a metade dos pacientes afectados non foron trasladados polas nosas ambulancias". Esta información foi comunicada pola compañía ao Sergas na mañá deste xoves para que "prosiga a súa investigación ao obxecto de detectar onde está o foco de contaxio".

A compañía relata que foi o pasado mércores cando "o Sergas se puxo en contacto coa empresa tras detectar que varios pacientes de diáleses da cidade deran positivo por covid".

Esta comprobación realizouse no marco do rastrexo que realiza o Sergas cando teñen lugar este tipo de situacións e o protocolo de aviso a todos os posibles contactos dos devanditos positivos.

Así mesmo, Servizos Sanitarios A Coruña subliña que "ningún traballador da empresa está de baixa por positivo en covid, nin confinado por contacto estreito".

Engade que "todo o persoal" da empresa segue "estritos protocolos sanitarios" para evitar contaxios, mentres procede con "o maior rigor" na desinfección diaria.