O PPdeG: "O BNG é tan responsable como o PSOE da suba das peaxes"
Miguel Tellado acusa os nacionalistas de "branquear" o incremento nas taxas da AP-9 ao gobernar en concellos e Deputacións con quen "incumpre a súa promesa"
Por Europa Press / Redacción | SANTIAGO DE COMPOSTELA | 23/01/2021 | Actualizada ás 17:31
O secretario xeral do PPdeG, Miguel Tellado, acusou o Bloque Nacionalista Galego de "branquear" a subida das peaxes da AP-9 por gobernar en concellos e deputacións co Partido Socialista, "que incumpre a súa promesa de baixalas".
"O BNG é tan responsable como o PSOE deste incremento que estamos a sufrir todos os galegos", asegurou o secretario xeral dos populares galegos nun comunicado remitido aos medios.
Tellado afirma que, en lugar de promover manifestacións en contra do Executivo central, "os nacionalistas deberían condicionar a continuidade deses gobernos municipais e provinciais que xestiona co PSOE a que se fagan efectivas de forma inmediata as baixadas das peaxes prometidas".
Ademais, sostivo que "chaman a atención" as declaracións do deputado do BNG no Congreso, Néstor Rego, "ameazando a Pedro Sánchez con botalo á rúa". "O BNG xa non ten ningún poder de influencia en Madrid e, cando o tivo, antes da toma de psesión, decidiu utilizalo para facer presidente a Sánchez a cambio de nada, de fume e promesas baleiras", sinala.
"Son cómplices das políticas tan lesivas para Galicia que está a impor o Goberno socialista", aseverou o número dous do PPdeG, que resaltou que se os nacionalistas de verdade quixesen presionar o PSOE ou realmente tivesen intención de dar un ultimato a Sánchez, teñen ferramentas para facelo. Deste xeito, segundo o PP, o BNG "demostraría que a súa prioridade non é ocupar un carguito nas deputacións senón defender os intereses dos galegos", engadiu.
FALTA DE COMPROMISO CON GALICIA
Tellado lembrou que o Ejectivo central prometeu bonificacións nesta autoestrada, transferila a Galicia e liberar a peaxe de Redondela, "pero ata agora o único que está cumprindo é o seu compromiso con Audasa, que se está enriquecendo co diñeiro dos galegos".
Do mesmo xeito, apuntou que o incumprimento de rebaixar as peaxes é só o último agravio dunha longa lista por parte do Goberno de Sánchez a Galicia. "Non debemos esquecer que xa nos mostraron o seu desprezo cando nos castigaron coa incautación de diñeiro referido á recadación dunha mensualidade do IVE na Comunidade, ademais de aprobar os peores orzamentos do Estado dos últimos 15 anos para Galicia.
