Educación publicará este luns a ampliación da oposición de técnicos de FP para "contrarrestar" a 'Lei Celaá'
A Xunta considera que a nova lei educativa estatal prevé "a extinción" deste corpo profesional
Por E.P. | SANTIAGO DE COMPOSTELA | 24/01/2021 | Actualizada ás 15:15
A Consellería de Cultura, Educación e Universidade publicará este luns no Diario Oficial de Galicia (DOG) unha orde que amplía a convocatoria de procedemento selectivos para profesorado técnico de Formación Profesional (FP), co obxectivo de "contrarrestar os efectos" da nova lei educativa estatal, coñecida como 'Lei Celaá'.
E é que, segundo asegura a Xunta nun comunicado, esta norma prevé "a extinción" deste corpo profesional que é "fundamental" para a formación do alumnado de FP, "especialmente no ámbito práctico".
Así, o DOG publicará este luns a ampliación destas oposicións, que ascende o total de prazas a 603 --561 de libre acceso e 42 reservadas para persoas con discapacidade-- en 24 especialidades.
A inscrición estará aberta desde o martes 26 de xaneiro ata o 15 de febreiro. A Xunta garante que aquelas persoas que xa se anotasen no anterior prazo --do 1 ao 19 de xuño de 2020-- "non terán que realizar unha nova solicitude".
No entanto, aqueles inscritos que queiran modificar a quenda de ingreso, a exención da proba da lingua galega ou outra circunstancia, poderán volver tramitar unha solicitude "que anulará a anterior" e non terán que pagar de novo as taxas.
