Por E.P. | | 24/01/2021 | Actualizada ás 14:55
A Policía Local de Ferrol precintou este sábado un restaurante situado en Doniños por "numerosos incumprimentos" da normativa sanitaria contra a covid-19. De feito, este negocio xa era reincidente por sancións anteriores.
Segundo informa o Concello nun comunicado, todo comezou cando ao redor das 15,00 da tarde unha patrulla que realizaba labores de vixilancia na zona se achegou ao local. Alí, os axentes identificaron primeiro a 10 persoas que estaban "a beber, de pé e sen gardar as distancias de seguridade". Ademais, relata o Consistorio, "varias estaban a fumar".
Tras isto, os policías accederon a unha área situada no lateral do edificio do restaurante que estaba cuberta e "pechada polos seus catro lados" cunha estrutura de cristal e aluminio. Nesta estancia, segundo cifras do Concello, había 23 persoas comendo e dúas mesas ocupadas "situábanse a apenas 15 centímetros una da outra".
Os axentes comprobaron que, aínda que había varias xanelas e portas que daban ao exterior, "todas estaban pechadas" e "non constaba ningún dispositivo de ventilación ou renovación do aire". Noutro espazo anexo ao edificio, que tamén estaba cuberto, localizaron tres bebidas sen terminar que deixaran alí os consumidores, que se marcharon cando chegou a Policía.
"NUMEROSOS INCUMPRIMENTOS"
Ante os "numerosos incumprimentos" da normativa sanitaria decretada pola Xunta, os policías identificaron o home que nese momento estaba á fronte do negocio, quen lles informou de quen era a propietaria.
Sobre as 17,00 horas, funcionarios do corpo local volveron ao restaurante para precintalo debido á "gravidade" dos feitos e á "reincidencia" nestas infraccións. Media hora despois, a titular do negocio acudiu ata o lugar e os axentes comunicáronlle as medidas adoptadas.
En canto ás persoas usuarias, formuláronse 13 denuncias individuais por non gardar as distancias de seguridade e por fumar.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.