Por E.P. | Santiago de Compostela | 25/01/2021 | Actualizada ás 18:32
O presidente do Goberno galego, Alberto Núñez Feijóo, destacou que o Consello Consultivo é un alicerce básico no desenvolvemento e protección do autogoberno, un espazo plural e independente no que a diversidade de visións está ao servizo dun só obxectivo: "velar polas institucións de todos".
Así o manifestou durante a toma de posesión dos seus novos membros, un acto no que Feijóo destacou a contribución deste órgano, desde a súa creación en 1995, para fortalecer a confianza nas institucións públicas da Comunidade.
"Así o entendeu este Consello desde o inicio, cando o recentemente falecido José Antonio García Caridad converteuse no seu primeiro presidente", lembrou para aseverar que a ese "honroso labor" entregaranse, desde este luns, Alberte Souto Souto e Nora María Martínez Yánez, aos que deu a benvida e desexoulles sorte e acertos. Unha responsabilidade que tamén seguirá exercendo Ignacio de Loyola Aranguren Pérez e José Luís Costa Pillado.
Nesta liña, precisou que, do mesmo xeito que aos seus antecesores, ambos contan para exercer as súas funcións cun atributo esencial, sen o cal non se entendería este órgano: a plena autonomía orgánica e a liberdade para orientar o labor das administracións públicas.
Nuns tempos marcados por unha "profunda incerteza e desafección", Feijóo aproveitou o acto para incidir na importancia do labor das institucións públicas para blindar a fortaleza dun "edificio institucional que se levantou hai décadas e que emana da Constitución, do Estatuto de Autonomía, dun espírito de consenso e converter os pousos da desafección nuns afectos e vínculos renovados".
"Un dos grandes remedios contra a incerteza e a desconfianza sempre foi un marco legal xusto que achegue estabilidade e credibilidade, e que canalice a prosperidade e o benestar ao que todos aspiramos", concluíu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.