16 positivos en covid-19 no cribado realizado a 489 mariscadores da ría de Pontevedra
Estaban convocadas 580 persoas.
Por Europa Press / Redacción | Pontevedra | 26/01/2021 | Actualizada ás 17:17
Un total de 16 positivos por covid-19 foron detectados nos cribados preventivos con PCR efectuados a pasada semana no Hospital Provincial de Pontevedra a un total de 489 traballadores das confrarías de Lourizán en Pontevedra, así como San Telmo e Raxó en Poio.
Diso informou a área sanitaria de Pontevedra, que destaca que acudiron a realizar a proba un total de 489 persoas sobre un censo de 580 profesionais do marisqueo cos que se contactou gradualmente e vía SMS telefónico personalizado. Este dato supón unha participación do 84,3 por cento da poboación convocada.
Na desagregación por colectivos, a iniciativa preventiva efectuada pola área sanitaria de Pontevedra asistiron 164 profesionais do marisqueo da confraría de Pontevedra, 200 da de San Telmo e 125 compoñentes da confraría de Raxó, que deron como resultado os citados 16 positivos por coronavirus.
A área sanitaria destacou que, dada a incidencia de casos da COVID-19 no colectivo profesional de marisqueo da ría de Pontevedra, a Administración Sanitaria Pública galega decidiu efectuar na capital da provincia cribados preventivos a través de PCR para determinar preventivamente as posibles infeccións por coronavirus entre estes traballadores.
