Concellos pontevedreses con menos de 20.000 habitantes poderán ingresar no plan para financiar servizos sociais
Os obxectivos deste servizo son mellorar a calidade de vida das persoas usuarias, posibilitar a súa permanencia no seu contorno de convivencia habitual e favorecer e potenciar a autonomía persoal no propio domicilio.
Por E.P. | PONTEVEDRA | 26/01/2021 | Actualizada ás 19:32
Tras a publicación oficial das bases reguladoras, os 52 concellos de menos de 20.000 habitantes da provincia de Pontevedra xa poden solicitar, desde este martes, a súa adhesión ao Plan de Cofinanciamento dos Servizos Sociais Comunitarios Municipais, ao que a Deputación pontevedresa destina este ano un orzamento de 2,5 millóns de euros, o maior investimento realizado pola institución ata agora.
Desta cantidade, o plan asigna 1,3 millóns de euros para sufragar a prestación directa do Servizo de Axuda no Fogar por parte de persoal especializado e 1,2 millóns de euros para cubrir os custos do persoal dos Servizos Sociais Comunitarios. Como novidade, este ano os concellos poden solicitar o adianto do 50% do importe que lles corresponda do plan.
O Servizo de Axuda no Fogar atende a persoas maiores con déficits de autonomía e persoas con discapacidade, especialmente no caso de que carezan de apoio no seu medio inmediato. Así mesmo, ten carácter subsidiario do Servizo de educación e apoio familiar, dando unha resposta preventiva, educativa e socializadora fronte a diversas situacións de familias en risco de exclusión social.
Os obxectivos deste servizo son mellorar a calidade de vida das persoas usuarias, posibilitar a súa permanencia no seu contorno de convivencia habitual, favorecer e potenciar a autonomía persoal no propio domicilio, manter, mellorar e recuperar as redes de relación familiar e social; previr situacións de dependencia ou exclusión social e retardar ou evitar a institucionalización, así como reforzar a solidariedade e potenciar o voluntariado social.
En canto ao persoal dos Servizos Sociais Comunitarios, a Deputación financia ás persoas traballadoras administrativas destes concellos, así como as do servizo de Educación e Apoio Familiar, que integra o conxunto de proxectos e servizos de apoio educativo e psicosocial dirixidos ás familias, co obxectivo de detectar, previr e superar as situacións de dificultade.
Así mesmo, axuda a promover procesos de cambio que favorezan un adecuado exercicio das responsabilidades familiares, a mellora da autonomía, da integración e da participación social das familias e unidades de convivencia.
