Dous detidos e 209 propostas de sancións no primeiro día de novas restricións pola pandemia
Establecéronse 560 controis en toda Galicia.
Por Europa Press / Redacción | Santiago de Compostela | 28/01/2021 | Actualizada ás 14:17
Axentes da Policía Nacional e da Garda Civil propuxeron un total de 209 sancións e detívose a dúas persoas nos 560 controis efectuados na xornada do mércores, o primeiro día das novas restricións sanitarias, segundo informa a Delegación do Goberno en Galicia. Neles, identificouse a 10.422 peronas e controlouse a 7.345 vehículos.
Durante a xornada do mércores a Garda Civil efectuou en Galicia 462 controis nos que identificou a 7.249 persoas e controlou 5.649 vehículos. A Policía Nacional despregou 98 dispositivos nos que identificou a outras 3.173 persoas e controlou 1.696 vehículos.
No que respecta ás propostas de sanción, 147 proceden da Garda Civil e 62 da Policía Nacional. As sancións representan o 2% do total de persoas identificadas.
A Delegación do Goberno explica que as Forzas e Corpos de Seguridade do Estado están a adaptar os seus dispositivos no cumprimento das novas restricións de mobilidade e de encontros sociais.
Tamén se reforzaron os controis de horarios e de capacidade nos sectores afectados pola normativa vinculada á alerta máxima aprobada pola Xunta, "sen esquecer a esixencia do obrigatorio uso individual da máscara".
