Persoal temporal convoca paros en servizos de igualdade e benestar
A folga está convocada pola CNT, a partir do 18 de febreiro e será de tres horas todos os xoves.
Por Europa Press / Redacción | Santiago de Compostela | 28/01/2021 | Actualizada ás 19:49
A CNT convocou folga a partir do día 18 de febreiro no Consorcio Galego de Servizos de Igualdade e Benestar, con paros a partir dese día de tres horas todos os xoves, segundo informou coincidindo coa convocatoria dunha concentración nesta xornada ante o citado consorcio.
A folga convócase tras a decisión adoptada, en asemblea, polo persoal temporal, "para defender os seus postos de traballo tras o anuncio da oferta de emprego público da Xunta do pasado decembro", explica o sindicato.
Á mesma, está convocado o persoal pertencente ás escolas infantís de 'Galiña azul', centros de día, fogares residenciais e todos os centros de traballo da rede do Consorcio, incluídos os traballadores de servizos centrais.
A CNT afirma que non obtiveron resposta ás súas solicitudes de reunión expostas á Administración autonómica e que nos lles quedou outra "saída" que a convocatoria dunha folga pola situación dun persoal cuxa situación cualifican "en fraude de lei" e cun "abuso de temporalidade".
Sobre estes traballadores, engade que reclaman "estabilidade" nos seus postos de traballo e que se paralice a Oferta Público de Emprego (OPE) 2020 "mentres non se atope unha solución para o persoal do Consorcio, que garanta que todo o persoal que actualmente está a traballar permaneza de forma estable no seu posto de traballo".
