Analizan un erro detectado na documentación sobre a propiedade de leiras en Meirás
O Estado non teme que afecte o fallo.
- O Goberno reitera que a exposición de Meirás reflectirá "todas as etapas"
- O Parlamento aproba que Meirás sexa cedido á Xunta e dedicar parte do pazo a Pardo Bazán
Por E.P. | A CORUÑA | 29/01/2021 | Actualizada ás 11:25
A Audiencia Provincial da Coruña, ante a que os Franco recorreron o fallo que os condenou á devolución ao Estado do Pazo de Meirás, solicitou documentación relativa á propiedade de leiras ao detectar un "erro".
Desde fontes xudiciais consultadas por Europa Press explicaron que se pediu unha documentación vinculada aos bens relacionados con Francis Franco "e se as súas participacións as pasou ou non á empresa Pristina". "Hai un erro", apuntaron, á súa vez, desde a Delegación do Goberno que precisaron que "non coinciden" os datos do "rexistro da propiedade co catastro". No entanto, ao ser preguntados se existe preocupación pola posibilidade de que isto dese lugar á anulación do xuízo e a sentenza ditada polo Xulgado de Primeira Instancia número 1 da Coruña, descartaron temor a este respecto.
"En principio non hai problema", dixeron remitíndose "ao que di" a representación legal dos Franco tras transcender que non pedirán a nulidade. No seu recurso ante a Audiencia da Coruña, os Franco pediron a revogación do fallo do Xulgado de Primeira Instancia número 1 da Coruña que os condenou a devolver o Pazo de Meirás. Sobre esta sentenza, cualificárona de "notoriamente parcial, nesgada e tendenciosa".
SEN "FUNDAMENTO" PARA NULIDADE
Respecto diso, o alcalde de Sada, Benito Portela, en declaracións a Europa Press, asegurou que non hai "ningunha causa nin fundamento para unha nulidade das actuacións". "O asunto está aclarado e liquidado", manifestou tras confirmar que o mércores a representación legal dos herdeiros do ditador achegou documentación a este respecto.
Con ela, expuxo, "resólvense todas as dúbidas expresadas pola Audiencia". "Unha documentación na que queda probado, con dous documentos notariais, que Francis Franco achegou á sociedade Pristina, personada no proceso, a sétima parte da totalidade das leiras rexistrais obxecto da sentenza".
